Piše: Milovan Matetić (va knjige “Saka vas, svoj glas”, va izdanju Udruge umirovljenika i starijih osoba Matulji)
Gani nekamo da biš se vrnul!
Ako reš zgoru i zgoru prit ćeš do vrha, a ondat nazada zdolu i zdolu.
Ako reš zdolu i zdolu prit ćeš do dna, va dol.
A ondat moraš zgoru i zgoru.
Ponekad moraš poć i po ravnen, pak opet zdolu al zgoru.
Da j’ više ravnega, život našen staren bi bil čuda laglji, bi rabilo manje truda i muki, al ča se more.
Da bi se preživelo moralo se j’ hodit i hodit…
Baren je čuda besed ustalo.
BRÊG – brdo, brdašce
- Ren na breg! (na ravan vrh)
- Ren pod breg! (u podnožje)
- Ren na vrh brega! (na najvišu točku)
- Ren va breg! (na padinu brda)
BREŽȈĆ – rijetko se koristi
BREŽȈNA – rijetko se koristi, češće se koristi veli breg
BATȈCA / GLAVȈCA – ravan vrh brijega
- Na batice j’ samo jena kuća.
- Bivan na glavice.
SR̂H – uzvisina
- Na oven srhe vavek malo puše.
SRŠȈĆ – mala uzvisina - Poteci na sršić pak videj ča se š njega vidi.
GORȀ – planina
- Na gorah se beli sneg!
- Va goru se j’ šlo z ovcami o mlade lete.
- O podzime su se paleri z gori vrnjevali doma.
DÔL – dolina
- Ren va dol.
- Prišal san z dola pak san trudan.
DOLȀC – mala dolina, udubina - Va onen dolce j’ dobra košnja.
DŌLČȈĆ – mali dolac - Va oven dolčiće kapuz vavek dobro rodi.
DŌLČȈNA – rijetko se koristi, češće se koristi veli dolac
ŪPȀD – dubok dolac sa strmim pristupom
- Va upade j’ malo sunca, čuda hlada.
ŪPȀDIĆ - Va oven upadiće j’ do najdalje snega.
DRȀGA – dug prostran kanal
- Čuda je hodit od jenega kraja dragi do drugega.
ŽLÊB – manja draga
- On žleb je obrnjen proti suncu, pak tamo na lehah lepo grozje zrene.
ŽLEBȈĆ - Va oven žlebiće j’ lepeh bukav i ceri.
KLĀNȀC – uzak kanal
- Prišal san po oven klance, ma j’ jako zarasal.
KLĀNČȈNA – veliki klanac - Kako j’ dug ov klančina!
KLĀNČȈĆ - Pasaj po oven klančiće i za čas si pul njigove kuće.
RẼBAR – kosina, obronak brda
- Po rebre zgoru, po rebre zdolu.
REBRȈNA – velika rebar - Hod po ovoj rebrine i prit ćeš do vrh brega.
REBRȈCA / STRMÃNCA – mala rebar - Pokosil san onu rebricu nad put.
- Ova strmanca j’ puna kamena.
LȀZ – rebar ili kosina kojom se često prolazi
- San prišal do tebe po laze.
LȀZINA – veliki laz - Po oven lazine se brzo pride va dol.
LȀZIĆ – mali laz - Samo još ov lazić i već san doma.
RÃVAN – ravna livada, dvorište
- Na ravne se najlepše kosi.
- Ala, deca, hote na ravan!
RAVNĨNA – velika ravan, polje - To selo j’ na jenoj ravnine.
RAVÂNCA – mala ravan - San šal zgoru i zdolu i sad ležin na jenoj ravance, gljedan va vedro
nebo i mislin: koliko san tega pasal…