Piše: J.O.Hrvatin
Prvo nego poć na vlak ujac je otprl radio u kuhinju. U kambru kadi smo bili mi dica se je ud ranega jutra čula lipa muzika pa je to ostalo u spomin. Jimil je i jenu škatulu z muziku ča mu je rabilo za se ubrit. Kada je je utprl se je pokazala špegla ka je bila zdola pakrova. Zas strani je navil pa doklje se je bril mu je svirala muzika, una „gondola“. Takovu je bila mama kupila u Trst, z gondolu i tu istu muziku.
Kada smo na Miholju bili u Pasjak su naši stariji pobandali, a mi prespali poli susedi. Stric Stanko Krajnikov se je spravljal ujutro za na vlak ki je šal na pet i kvarat zas Šapljan u Riku. Radio je i poli njih sviral.
Čuli smo slovensku polku „Moj fantič je prijezdil“ (moj dečko je dojahao). Najprvo solo trubenta i opet na sredi i na kraj trubenta. Potlje se je čulo „Tam kjer murke cveto“. Murke su kaćuni. Potlje je bila muzika z Hrvatskega zagorja, Međimurja i Podravine pa slavonska pa dalmatinska. Pozatin su bile bosanska, srbijanska, makedonska kola i na kraj z Kosova. Tako smo spoznali muziku z raznih kraji. Ta ista jutarnja muzika se je još ki put ponavljala pa mi se vidi da su već to vrime jimili snimljeno za naprid.
Radio su 1950-ih let jimili tri u selo, Kundini „Ozren“, Šimenovi „Kosmaj“, a mi od 1954. „Dubrava“. Spametin se da su h nan po nediljah prihajali monteri radi utakmice. Za najavu emisije „Sport i glazba“ je popodne opet zasviralo. Radio je bil blizu okna, a oni sedili pred otprto okno i pošljušali. Bilo je to po leti okoli 1955.leta.
Kada smo se već doselili 1960.leta na Zamet se je z okna vidila velika Krupp dizalica u Treći maj. Od pete do šeste ure se je opet na razglas čulo muziku z radija z raznih kraji, a na šest se je čulo znak geofizičkog zavoda i je spiker rekal „šest je sati, ovdje Radio Zagreb, vijesti“.
Muzika je utihnila pa smo čuli nabijanje po železu.
Na mislih mi je i da su na radio rekli „udarac o gong označio je…sati, radio stanice Ljubljana, Zagreb, Sarajevo, Beograd, Skoplje, Titograd i Priština“ pa muzika, ti put za Veselo veče.
Radio Rijeku smo najveć pošljušali u nedilju kada su bile “Pjesme po želji“, od osme ure ujutro ki put i do osme uvečer. Tu smo se opet nauživali razne muzike ku su ljudi naručili za rojendane, ženidbe, za u vojsku (Jedno jutro poslije sedam sati…).
Spametin se da smo uz muziku z Radija Rijeka sestra i ja žicali palkete, mazali čeru pa glancali z hrtaču veliku kot stopalo z drvenu ravnu dasku. Zgora nje je bil pas za uvuć nogu. Tako smo glancali po taktu. Potlje je rabilo z obe noge zglancat s krpami, a za to nan je već najbolji bil tvist z radija.
Kada su jih lakirali već nismo morali. Joh je prepasal.
Na Radio Rijeku smo obavezno saki pandiljak pošljušali pomorske večeri. Komoć smo čekali aš pomorci su nan bili susedi, a muzika lipa. Najprvo „mornari hrabri ko legende glas“ pa „Oj more duboko, sva moja radosti…“. Tako smo čuli da je ti i ti brod u Antofagastu, drugi u Galveston, Pirej, Famagustu, ali ku već luku u svit. Priko radija su mame i žene pozdravljale posadu broda i „dragoga sina jedinca Marina…pozdravlja mama Luce, tata Jere i novorođeni sin i sretna mama Marija. „Dragi sine sretan ti put i dobro more i vrati nam se brzo, željno te čekamo“. I takove, teple besede.
Mislin da su najveć puti bile „mornaru mili s Jadrana plavog…vrati se, željno čekam te ja“ i „Slušaj mati ove riči moje”.
Nauživali smo se pjesam, najveć dalmatinskih (Grupa Dalmatinaca Petra Tralića, klapa Filip Dević i druge).
Na Radio Zagreb je po nediljah bil šaljiv prilog o nestašnemu frkolascu Zvonkecu ka je vavik finila z besedami oca “Marice, šibu!”. Ni to ni pasalo brez muzike.
Posebno rada san pošljušal emisiju “Po vašem izboru”. Leta i leta je durala, do 1984.leta, po tri kvarte ure, od podne i kvarat do ure, pa mi je u glavu i muzika s početka te emisije “Sunny side of the street” (kako je svira Tommy Dorsey i njegov orkestar). Za odjavu je bil instrumentalni del “Et maintenant” Gilberta Becauda.
Bilo je i džeza pa se domišljan zeca, crtani lik emitiran pred dnevnik (mislin da je bila nika reklama), z džez muziku.
Moral san uvo napisat: po nediljah je bila i muzička najava z filma “Treći čovjek”, mislin da je glas rekal otprilike Harry Lime – Tveči čovjek. Bilo je o kriminalu, se zna.
Ni čudo da se zbudin z kakovin refrenon. I danas mi je u glavu muzika, kako i celo življenje.
Prilog: Račun z timbron Radiocentar, Rijeka, Žabica 1 od 17.XII 1954. Prodaja Br. 8971 F.
Piše z tintanu olovku Radio Dubrava 3156 i cena Din 35.800.