Piše: J.O.Hrvatin
Brusan je bil vridan ljudon ud začetka do finitka, od rojenja do smrti. Tamo je voda, a ljudon i blagu Šapljan i Pasjaka je bila hrana. Nasred polja je potok, a livo od potoka njive Pasjaka i desno Šapljan.
U plan navodnjavanja Županije PGŽ ud 4. studenog 2006. je napišeno da će se u polju Brusan kot prioritet storit nova akumulacija aš da je u Brusan oko 15 ha „zemljišta koje bi se moglo navodnjavati i privesti intenzivnoj poljoprivrednoj obradi“.
Geometri su po Brusnu mirili i nacrtali plane ma akumulacije, te nove dolanje fontane, ni danas ni. Strošak su storili, platili smo, se zna, mi. Još piše i o interesu Republike Hrvatske i lokalne zajednice. Uni ki su plan delali su mi povidali da je „interes lokalnog stanovništva bio velik“.
Slovenci su još 1984–1987. storili akumulaciju Klivnik, reču i Klivniško jezero. Slovenci su mogli, mi ne moremo?
Od 2006. leta od plana do danas je pasalo dvajset let. U planu napišene zadruge „Agroliburnija“ i „Oleander“ se sa leta ne spominju u vezi z Brusnon, s tin i si „stručnjaki“ ki su ča znali su pospravni u „spominjanja“ –nekad bili, sad se spominjali.
Prišli su novi ki su za Brusan morda samo čuli, ma tamo bili ne i ne. Ne čudi da fanj ljudi ki bivaju dalje od Permani govoriju da je interes općine do Permani, dalje ne.
Od prvega mostića na ulazu u Brusan do Fontane je okoli četrdeset minut hoda. Polje Brusan je dugo okoli dva i pol kilometre od ceste potlje Šapljan pa Pod most do tunela, a široko okoli dvistodvajset metri. Od fontane do panora patok je dug približno 1800 metri i voda požira pod zemlju zdola Šapljan u Preluk i Opatiju. Storena je prova 7.11.1990. leta (trasiranje). Ljudi poduzeća „Hrvatske vode“ su vrgli farbu u vodu, a 18. i 19.11.1990. leta je bilo vidit da je zvirala pofrbana voda, u Opatiju u Preluk, na Slatinu, poli hoteli „Kristal“ i „Admiral.“ (Izvor: Hrvatske vode, Rijeka i Plan navodnjavanja, SN PGŽ godina XIV. broj 43).
Čaz leta san niča doznal pa san sada odlučil pitat une ki za se misliju da se brez njih ne more. Ti novi su nase prezeli i se ča su prvo njih potpisali uni prvi. Ni za pisat litanije nego popisat izvore od kih san ča doznal pa ko ki i dalje misli da se brez njega ne more neka prečita ča u te izvore piše od Brusna, značaja vode i prioriteti navodnjavanja, pa premisli ča rabi storit za ljude, za kupivat „domače je domače“ – pitat restoratere ki su, friško, počeli zapirat aš da domaće hrane ni pa da je interes gosti manji.
Izvori: Građevinski fakultet Sveučilišta U Rijeci, Zavod za hidrotehniku i geotehniku, Plan, broj el. 602-11/05-01/109
Tekst tega plana piše na str.236 do 239. U prilogu je i slika plana. Poveznica za nać plan je dokument naziva Brusan navodnj PGŽ akum.pdf.
O planu niča piše i u prilogu Službene novine PGŽ, godina XXV. – broj 20. petak, 28. srpnja 2017. i u dokumentu općine Matulji ppuo-matulji.pdf. Meni ne rabi odgovor „stručnjaki“ ni nadležnih, tih novih. Čekan da se, po njihovi navadi slikaju si koliki ma i, ko su za ča, da reču – bili smo u Brusan, sada znamo kadi je, pogovarali smo se z ljudi i sada najvažnije – kreće izgradnja akumulacije Brusan aš „mi volimo svoj kraj i dalje od Permani“. Morda neću čut kako ča su drugi da „—e se meni“ – pitat une ki su.
Već san napisal ma ću opet – kako u „pačju školu“ nisu se maknuli dalje od početka, si koliki, uni prvo i uni potlje.
Kastavskega načelnika san sritil u Brusan, ma druge od PGŽ do Matulj ne.