Piše: J.O.Hrvatin
Veljbi su najlipši arhitektonski deli građevine. More bit veljb nad oknon, nad vrati, nad ognjišćon i po vrhu šterne. Poli nas su zidani zas kamikon. Do zidari ki su znali tako zidat se je posebno držalo. Zaobljen bačvasti svod, u Pasjak veljb, jimaju hiše Kalčova goranja, potlje prozvana Oskarova, kbr. 5 (stari broj 40), Rejčova kbr. 37 (stari broj 44, hiša je predviđena za zaštitu kot kulturna baština), pa Dolinkina, kbr. 58 (stari broj 32), Vrtoličina kbr. 33 (stari broj 7), a jimile su i Stipenova stara hiša i Šaletova goranja.
U školu su nas vadili da je to rasteretni luk aš prezame del peze ud zidi udzgora i prenaša na zid ali stup zdola, a nosi i sam sebe.
Do potlje Prvega svjetskega rata su bila ugnjišća, zidana zas kamikon, ali upuku, većinoma z kamikon, zidano na veljb.
U Dolinkinu hišu je kuhinja z više veljbi i takove su najlipše.
U hišu zgora Doma, na Štubih, hišni broj 52, je veljbano okno na stran proti Šapljanon.
Na črno belu sliku z Brc se vidi veći veljb zgora otvora kemu rečemo lupa (slika od 1978.), ča je i prolaz puta čez selo. Na zid su nagnili poljsko urudje, orna kola, branu, gnojni koš.
U Rupu je lupa zaprta z vrati pa je bila za spravit voz (kolnica). U Pasjak mu rečemo i jugno. Kada su finili jamu za šternu su veljb zidali zas sklesanimi kamenimi pljočami.
U crikve su posebno lipi veljbi, tako i u našu Sv.Mihovila, slikanu na Miholju, 4.10.2009.
U polje Brusan udzdola pa sve gori do fontane i tunela su propusti pod štriku z veljbi. Čaz njih teče voda pod železnicu ka od štacjona Šapljane gre h Bistrcu. To je voda od zvirki ka se uliva u potok istega imena Brusan. Sakemu propustu pod štriku Paščani i Šapljanci reču Pod most, kako i unemu na samu cestu u uvinak za prit u Brusan.
Na slikah ud Fontane doli najmanji propust (broj jedan) je znutra akumulacije, spremnika vode, Fontana, drugi je potlje brane, na dno je najveći treti čez kega su pasivali Šapljanci z vozon po žir i lìtinu, a i Brijci na noge do cimitra i crikve u Ješane. Širok je 2,80, a do luka visok 3,00 metre. Četrti ni veljban pa ga na sliku ni, a čez peti, desno doli, rečemo da je paški aš je bila bližnjica za pasivat ud sela do cimitra ali crikve u Ješane. Ti paški je prvi udzdola.
Uni inžinjeri ki su zamislili te propuste i uni ki su jih delali su jimili pametnu batícu. Prvo nego jih delat su morali ubać sa ta mesta, zagledivat kuda voda pasiva, kamo se shaja i kada je vode najveć i vidit kako zgleda polje Brusan kada voda poplava. Poznali su vodotoke i silu prirode i vode ka se s takovu moćju zliva po dolinjskih i šapljanskih rebrah čaz Križne cere i Žlibe doli. Znali su ča bi voda storila da nima mesta za slobodno požirat pod štriku u patok i dalje u Panor.
Veljb, a nikâdi i velb, je germanizam od njemačkega das Gewölbe.
Za črno-bele slike san dobil dozvolu Konzervatorskega zavoda Rijeka.