Piše: J.O.Hrvatin
Ko su nan kot dici ali fantićon štrčili lasi na glavu, su nan užali reć da su to hudićovi, ali vrajži lasi. Nijedan češalj ni pomogal, ni briljantin kašnje aš, ki je jimil takove lase, su mu smiron štrčili.
Uve pasane dane „od kiselih kumari“ ali originalno „sezona kiselih krastavaca“ smo se nagledali bale.
TV se je pobrigala da za vrime tega merikanskega nogometa ni nič drugo za gledat. Morda će rabit zaprit silne TV programe pa storit jenega kega vredi otpirat. Na TV se z Merike more gledat kriminal, na kamione mrtvih, vojake ki oslobađaju zemlje od njihovih domoroci pa njin meću z zraka hiljade ton otrovi za potrovat zemlju 200 do 250 let naprit. Kako merikanske filme tako druge ma se je samo kriminal.
Već pred pedesetak let su naši ljudi let užali reć za se če njin je pačilo da to je kriminal. Unin na TV su glavne reprize i kriminal pa se domaći tati jimaju na ča ugledat. A da se ne govori za une ki se spakivaju i repenčiju zgovarat reklame pa ti se štumih ubrnja aš kada zreču TEVE ne znaš kada ćeju zbljufat se zas sebe.
Za jenu nonu su rekli da je dala poničit darovanu nekretninu unuki kada je doznala da te reklame čita ona.
A ti „vrajži lasi“ su krivi aš da su dotaknili balu, je „rekla“ tehnologija. Jedan ki ne more brez bale da je rekal – još su mi dva ostali na ćelu ma sada jih gren utfliknit, nećeju mi već pačit, vrajže dlakine, ne. Tako već neću bit u „ofsajd“.
Još je niča za znjurgat – ča je pravo, reču da je i bogu drago pa sudiju i ženske. Ma moj ženso njurga da to ni pravo aš da „kemu ću sada kričat sudija lopove, ja nis navajen proklinjat žensku.“
Mi je dalo mislit aš već ne vredi „slobodno sudačko uvjerenje“ nego „ajti“ tehnologija, a med nju i birokraciju ni razlike. Te su važne same sebi i unin ki su to skomandirali. Doklje smo gledali balu, su spominjali koliko ki igrač vredi dolari, euroti, hiljad, milijuni i milijard, a po pravu reć mnogin ki su gledali su takvini napol prazni.
Ukratko – ko buju skratili poluvreme na pol ure, poničili ofsajde, a jigrače pustili da jigraju brez mislit na tehnologiju, mi se će da bi moglo ča bit, drugače neka gleda ki ga je lačan. Zato je mali nogomet već zanimljiv od „velikega“ aš uvo je bilo štufno i preštufno. Uva vrimena su moderna, nisu za dvi-tri ure žbalit u jeno mesto.
Niča je bilo i dobrega – nis vidil da goriju baklje i nis čul topovske udare ni dimne bombe, a nisu mi ni falile.
Ja san za unu nonu aš niman rada da me držiju za monu.