Z knjige Jelke Žilić “Va kotliće zmešano”
Štajon je od lahke hrane, a i djete se na velo prakticiraju. Trebe se čuvat kilaže. Sad je najbolje vreme za neki obedi keh moreš čudo pojist i prćuh napunit, a da, zaspraven, je se jako malo kalorij. Duhtori nas straše da se čuvamo hrane, cigareti, vina al’ alkohola, stresa i sto drugeh čud. Ma neč treba i jist. Pa provajmo od tikav, ako smo ih va vrte posadile, sad je štajon od njih.
Tikva, tikvica, buča, bundeva, misirača, dulek, bela buča, žuta bundeva. Našla san i latinski naziv cucurbita pepo. Ta naša tikva – pepo, prišla je prek mora kot i čuda druge hrane. Negdere je zapisano da prva vijest potiče od Kolumba, 3. prosinca 1492. leta. Neboh Kolumbo bil je va Merike, da brižan ni ni znal, ma je tikvu pripejal. Europska kuhinja najprvo ju je koristila za blago, malo pomalo zavukla se je i na stol.
Danas ću van preporučit nekoliko recepti. Provajte, ako još niste morda ni znale neki novi recept, aš od tikav se da tako puno improvizirat, da saki put otkrivamo neč novega.
Ča se moremo kuhat? Se! Od juhe do slatkega! Saki put ću uz recept povedet i od kakove tikve se ča kuha. Najveć ćemo kuhat duge bele i zelene tikvice, vele, mesnate narančaste bundeve i jako duge zelene tikve. Našla san podatak da je ta tikvica ku najviše imamo va našen vrte prišla z posve drugega kraja sveta – iz Indije, pa je najprvo rasla na Molučkim otocima, a onputa preko sjeverne Afrike prišla h nan.
Krem juha od beleh al’ zeleneh tikvic
Opća je napomena da za sa jila tikvice moraju bit mlade.
- pol kila tikvic
- dve žlice uja
- žlica muki
- jena mića kapulica
- petrsin
- sol i papar
- litra i pol vodi
Tikvice olupimo, prepolovimo, znamemo paškvice. Nasjeckamo ih na manje kockice. Na uje malo prepržimo kapulicu (samo da ovene) i na to stavimo tikvice. Obrnimo ih par put, pobrašnimo (žličica muki), podlejemo z vodun, posolimo, popaprimo i kad provre (okol pet minuti) dodamo sitno narezanega petrsina i pest riži. Kad su riži al dente, juha je zgotovljena.