Za Svjetski dan vod, 22. marča, štorija od vodneh resursi našega kraja:
Piše: J.O.Hrvatin
Veselimo se vidit vodu, jur je prvi živi svit prišal z vode na kopno. Brez nje ni življenja, a i telo nan je do tri kvarte voda.
U školu su nas vadili ud Starih Slaveni. Kada su dojahali i zagledali more zač su odlučili ustat?
Jeno malo vodnih „resursi“ san vidil kuda san hodil. Jimamo Paški studenac, Brijci tudi, ma jimaju i zvirke pod zemlju opjevanega vrha Golac kako lipo pjeva Duško Jeličić pjesmu Nenada Smajile.
Poli Paškega studenca
Ne znan ko je šal vidit ga, ma ja san i žnjega se vidi “murje“, a i voda se ud zvirki shaja u fontanu, pa po patoku dalje u Preluk i Opatiju.
Paški studenac
Vavik san bil vesel te lipote, prelivanja vode zas fontane u patok, šum zlivanja zvirki spod Žlibi ud šapljanskih, a i dolinjskih rebar doli u Brusan. Gledal san kako potočići ahtaju priko kamiki h Brusnu. Po putu doli nanašaju manje kamičiće i slažu na dno patoka.
Potok Učka
U Žijane san bil poli lokve i studenca i patoka Pod Učkun. I tamo se valići naganjaju, veći priko manjih, ki će prvo prit, mami jih Medveja i more. Ni čudo da tamo zavruja vruja.
Paški studénac je vas znutra zidan ud kamiki. Škulja je kot okno, široka 150 cm i visoka 120 cm, natla je popločan kameni prag, koso na nutra denjen širok kamik. Zidi znutra livo i desno su 170 cm do obloženega zida ki tiče teren. Dno, dimboko okoli jedan metar, je popločano zas kamenimi pljočami širokimi po priliki pol metra. Voda smiron pomalo zvira, a kada se je nabere se zliva priko i dela potočić. Na veljb studenca je urezano u cimentnu meltu 1931.leto.
Studenac Žejane, a desno Ričina, Martinovo selo
U korito ud studenca, kada je pun, nateče nikih 2500 litar vode. Za sest su storena dva počivala, dvi klupi ud kamika z naslonon, z live i desne strani okna. More se sest i počinit prvo nego poć z vodu doma, z lodricu uprćenu na hrbat. Tamo su Paščanke prihajale prat robu, čekale doklje nateče vode i da se pošuši, ujutro na Studenac, popodne doma zas suhu robu.
Za delo na Zborniku Liburijskog krasa, 2011. smo šli ubać studenac. Ing Dean Doričić z „Komunalca“ je zel uzorak vode, a kumpanjala nas je Elza Smajila, Vrtoličina. Bilo je to prvi put da smo u zbornik objavili bakteriološki nalaz vode.
