Od 2013. leta do danaska z Hrvacke je partilo već od 300 hijad judi. Puno smo zgubili, ma va narodnoj banke su zračunali da nan zvani soldi nazada lete. Tako j’ z Njemačke va prva tri kvartala pasanega leta od našeh iseljeniki uplaćeno 1,6 miljardi eura, z Irske 456 miljuni, a z Nizozemske 416 miljuni eura. Se skupa – 4,2 miljarde eura. Će nan ti soldi ča pomoć – trebeda neće, aš va butegah ni ki delat, autobusi ni ki vozit, va školah i bolnicah ni ni kuhari, ni čistačic. Badave nan si soldi.
Štoriju od partidi z Hrvacke, ku j’ napisala Vlasta Sušanj Kapićeva, smo va Škabeline objavili još pred pandemijun, ma se niš ni promenilo, a ni neće. Judi nan gredu, pa boh:
Od kad se j’ Kolumbo skrcal va Noven Svete, va Merike, judi su se počeli tamo shajat. Bežali su od siromašćini, nedela, nemotarij i pulicije. Kako ki.
Z oveh kraji tirala ih je teta nevoja. Pred neko vreme, bilo j’ o Martinje, 2017., dopovedel nan je Zlobinarac Radovan Tadej kako su va Meriki hodili njihi judi, Zlobinari i Hreljani skupa. Iseljavanje je ovde počelo na kraje 18. stoleća. Neki su šli samo zaslužit za kuću al šternu, neki su zavavek ostali zgubjeni, neken se i danaska tamo nahajaju grobne ploče.
Judi su hodili ća aš ovde ni bilo dela. Vele su bile familije, a samo jedan, obično najstareji, je mogal ostat na starine, dogledat oca i mater i onda nasledovat. Si drugi su morali poć ća od domi: muški, ženske, neki su bili još deca. Najmlaji su imeli trinajst let, a stareji najviše do četrdeset i pet let.
Z materine i očine familije isto su šli trbuhon za kruhon. Kako san bivala pul Kapićeveh, tako san znala da Nona Kapićeva ima va Merike dve sestri. One su bile krenule preko mora okol 1920. leta, pokle Prvega rata. Se su bile neoženjene, ma su skupa s frajari partile i tamo su se oženile. Nona Kapićeva ni otela poć ća od domi niti je muža pustila samega, aš je i on otel poć tamo neč zalužit.
„ Ale cela familija skupa, ale niš!“ bil je njiji ordin.
I tako ni bilo niš od njihe Meriki, aš nono bi bil mogal nabrat za put tristo dolari samo za se, ma ne za seh. Već ih je onda bilo šest va familije! I spametin se da j’ ostala pul nas ta fraza: „Rabi mi tristo da ganen!“ Aš za poć va Meriku rabilo je onda tristo dolari.
A ta fraza „tristo da ganen“ rabila se je za se neke stvari: ako si bil len za ča poć storit, ako te niš ni bilo voja, ako nisi neč mogal storit, al ako se j’ kemu lenivcu otelo narugat!
None Jušićevoj je va Meriku šal najstareji brat Lojzo Sušanj. Najprej je šal videt ča i kade će moć ča zaslužit, pokle se j’ nazad vrnul po ženu, prelepu Andrijanu od Spinčić. Ona j’ bila šilica. Svojo delo je delala i kad je prišla va Meriku. Bila je doma, decu čuvala i šila za svoju familiju i drugeh. Vavek je imela posla aš je bila dobra šilica, a imela je jako dobar ukus i znala je ženske dobro svetovat. Kad san 1984. leta bila va Merike šla san ih obać. Pejala me je naša Mili i čuda smo se vozili. Oni tamo se na ure broje. Vozili smo se više od četire ure. Kad smo najzad prišli, Lojzo je bil na krove, dofinjevali su ga pokrivat, aš da njin je pušćalo. Već je bilo jako kasno, morda su i tri ure pasale dokle se ni s krova spustil. Ni bil fasciniran s ten ča smo preko sveta prišli, ni ča smo ga prišli videt.
„A, ti si od Milki!“ I to mu je po prilike bilo se ča mi j’ rekal.
Njegova žena nas je bila počastila, povedala od svoje familije, pet sini su imeli, tako da j’ imela vavek velega dela okol njih. Tri su delali va građevine kako i sam Lojzo, on je bil zidar.
Zapametila san Andrijanu, aš je bila jako lepa i tanka va pase, kako manekenka. Imela je preko sedandeset let kad san ju po drugi put ovde videla, okol 1990. leta. I još vavek se j’ za njun rabilo dvaput obrnut! Imelo se j’ ča i videt!
Ta put je bila rekla da više neće prihajat, da j’ z decun prišla, da neka upoznaju njiji rojeni kraj. Bila je tu svojen sinon i vnukun. Bili smo si skupa videt Kastav i obać grobi. Jako lep dan je svetil pred crekvun od svete Jeleni i gledali smo on prelepi del našega Kvarnera i Učku. Pak je nonu Andrijanu pitala vnuka, po merikanski:
„Kako ste mogli ća poć od ove lepoti?!“
„ Nismo imeli ča jist,“ odgovorila njoj je nona.
Aš od same lepoti se čovek ne more najist.
Foto: brandstaetter images/Sammlung Hubmann/picture alliance
2017. leta z Hrvaske je va svet partilo više od pedeset tisuć, više od sto tisuć, više od … ekonomska emigracija. Se mladi judi, i cele familije, i stručni, aš su ovde prez dela. Ako i delaju onda su jako slabo plaćeni, tako slabo da ne moru od te plaće skrpat cel mesec. Za plakat!
Niš se ni promenilo od onda, od kad se je odovde parćevalo trbuhon za kruhon … niš.
Aš samo od lepoti se čovek ne more najist.
Piše: Vlasta Sušanj Kapićeva