Piše: Marijan Knez
Za oni ki ne znaju, otprilike:
batana ima krmu na trapez, pasara na srce, a gus je jednak spred i zad!
PASARA
Pasara je gospa bila, med barkami va moru,
mirno se j’ zibala, batane kad su zihajale va zoru;
a guc, debeli gospodin, širok, jak i meštar fin,
va njega je samo Frane smel, al’ njegov sin.
Pasara je vavek tendu nosila, da se ne bi zmočila,
batana je vezana bila samo kad je kiša točila,
a i va oni dani kad je bura puhala,
aš po takoven se van ne gre, ni to šala!
Guc, pak, po danu počiva, noć je njegova,
čuva ga od nasukanja jedna črna bova;
feral i osti i se drugo je već parićano,
čeka se mali Josip i barba Frano!
Vnuk me pita, da ki film to gljedan,
z glisera kad zihajamo jedan po jedan;
ma, za ča danas mladi već haju,
od barak stareh ni imena ne znaju!