Piše: Vlasta Sušanj Kapićeva
Mogla bi ovo bit i štorija od ženskeh imen. Ale moran počet od dolnjeh judi, ča će reć od onisteh ki su mi ov čas z druge strani Materi Zemjice. Ni straha, ovo je samo fraza, samo su neke besedi ke govore da niš na ten svete ne mora bit zaspraven. I tako neke knjigi pišu da se žensken, nejde va dvanajsten, trinajsten
stolećen, i još prej pisane povjesti, ni davalo imena. A namesto prezimena su muški dobivali ime od svojga posla. Pak san razumela da su onda bile neke materi, ženi, sestri, hćeri, udovice, od nekeh ondašnjeh Vibori, Stribori, Plamenci, Kosić, lugari, šumari, tesari, zidari, kovači.
A dr. Marija Mogorović Crljenko, pak, z pulskega sveučilišta „Dr Juraj Dobrila“ je pregledala se puno istarskeh urbari, pak je obnašla da su istarske ženske z onega vremena bile va jako dobren položaje, ako se meri prema žensken na ondašnjen evropsken sjevere. To je pak bilo tamo kade su gospodarili Kelti i morda kakovi potomki od stareh rimskeh soldati, ki isto nisu žensku tretirali kako čoveka. Ča se stareh Rimljani tiče ni ni čudo, aš oni su zmisleli gladijatorske igri ke su šle za ten da se zatare vas on svet ki ni rimski. Tako da, ča se zatiranja tiče, stvar ni od novejega datuma. Ale niš zato, tr to ni tema od ovega
pisanja. Nego su te imena, ženske imena.
Va kršćansko vreme su najveć počele bit Ani, Marije, kagod Antonija, na retko Mandalena, ekskluziva je bila Veronika. Kako je premalo imen bilo na raspolaganje, a dece jedan veli kup, to su hćeran dodali još i čigova je. Kadagod, a to isto piše va knjigah, je bilo rečeno još i kade ta otac biva, s kega kraja vasi je, aš z onega drugega kraja je isto bila neka mala z onen isten imenom, ale od druge familije. Ka je isto imela ime po neken mušken. Ma ni teh muškeh imen ni bilo za ća hitat, aš si sveci su posloženi va jenen lete od dvanajst meseci. Ženske su se počele ipak raspoznavat, aš je jena bila Marija od Ivana z Vele vasi, Ana j bila Toninova od strinineh, Mandica j bila udovičina al dovičina, aš njoj je mat jako mlada ostala dovica, a otac je nestal nejde po svete, i tako. Zet je bil štiman ako je zel hćer od kovača. Dobil je zajeno ženu, posal i poslovni prostor, koliko z okon makneš. Aš ženska deca nisu niš nasledovala.
Pak onda san šla na fata pošta dat veliki beči i kupila san knjigu va koj piše od ženskeh sudbin va malo novejeh, ma i hrvaskeh vremeneh. Spominje se Zagreb, aš tamo nan je vavek bil neki centar, pogotovo poslovni i vezan za poslovni pogoni va srednjoj Evrope. Pak tako piše i to da ženske ne moru bit ni vlasnice od poslovneh prostori, ne daj Bog od kakove fabriki. Ale muški vlasniki, ki su njihi oci, brati al muži ih radi drže blizu, aš one delaju se dela od povjerenja i financijske sigurnosti. Najzad, teško ćeš nać mater ka bi svojga otroka financijski zakopala. Ni brata, tr on ženskoj pride namesto oca, i to va ono
vreme kada su i stareji umirali mladi. Retko ki je dosegal šezdesetu. Jedino ako je muž umrl mlad, mogla je dovica bit na njegoven, poslovnen, vladajućen meste, i to na odrejeno vreme.
Čin njoj je sin postal punoletan, so je delo morala njemu zručit i opet poć doma. Ako pak dovica ni mogla, al otela zamenit va dele muža onda je to bil opet neki muški. San pozabila od ke je lozi bil tisti, je od pokojnega, al njije, I njoj je opet bilo onako kako je i bila navajna da njoj bude. A dovica ka je sinu očuvala posal ni niš dobila. Nit njoj je ki bil posebno zahvalan, nit je imela plaću, nit staža. Niš od ničesa za njijo dobro delo. A zapisano je i to da je baš rad tako vrednega dela od anonimneg dovic, se puno zagrebačkeh, i ne samo zagrebačkeh, posli obastalo. A vremena su za poslovat bile vavek teške, ne budi primenjeno.
I mogla bin još navrezat od teh stareh, Pak najzad jena lepa: nisan ni ja kamene za Bogon hitala. Iman ime, iman i prezime, bome i prićok! Službeno san ča san, zgleda da nisan baš ki zna ča, aš na to ime prijimjen samo računi i globi. Najbliže onemu vremenu od pred teh nekeh stotin let zapisana san na opatijskoj
Grutovnice: Vlasta Sušanj Kapićeva, rojena Babić. I niš mi to ni pomoglo na sude. Za sen ča mi je va vlasničken liste se to bilo zapisano, petnajsto leto teče kako moj spor još ni rešen. Zadnjeh dve-tri leta z pogreškun od suda. Pojili su mi Sudi se suho i sirovo, albokati san promenila ne znan sama koliko, aš ni od njih ni nijedan otel s manun posla imet. Ča će reć da mi slavna povjest dobrega položaja istarskeh
ženskeh duš niš ni pomogla. No dobro, ovo san ipak za dušu zitresla.
Nećete verovat, najviše mi puti na pamet pade ime od Jasmina Stavrosa, Pravo ime mu je bilo Milo Vasić. A čovek, onako šestan, se misliš da je Grkljanin dojahal z arhajskieh vremen, a ne da je z neke bosanske kasabi zišal. A je, baš z nje, i pustil grlu glas: „Ča će mi sto Amerika … pa da sjednem na verandu i brojim
valove!!!“ Morda gre tako ta njegova, a morda i kako drugačje, ma štorija more se podnest. I preselil se je va Split! A ja san sa vesela kad ga vidin i čujen. Sputen san doznala da zna i sost, da ima šesnu familiju i za nju skrbi. Govori da ne troši previše kozmetiki. Koliko san videla pasaneh let, aš pratin ga, se neč je promenil. Prej sega mu je kolor od vlasi se črneji, vlasi malo kraći, al malo daji. Ale jeno mu je vavek isto:
nikad ni prestal skijat. Nadan se samo da mu je to ostalo još od onda kad je rusal po bosanskeh gorah. I ne pasa nijena zima da se ne otputi skijat po Dolomiteh! To j čovek za me!
Pak me onda opet preseče. Mislin malo od oveh pasaneh meseci od koroni i izbori, sam ne znaš ča j od tega huje. Bila su imena napisana na transparenteh, po zideh, po novinah još i va tabelah i grafikoneh! Imen koš i još! A nijeno, škoda, s kakoven sočnen prićokon! Magar bi bila sila da njin se, ten neken imenan, čagod ne prikola. Toliko su ipak zaslužila!
Pak onda opet malo svetla na celoj dajine od tunela. Se neke nove, ženske, imena su se probile do našega Sabora. Saka ima ime i prezime, svoj posal i svoju dotu. Nekoj je od materi i oca, nekoj od muža, neka si je se svoje sama zaslužila. I more pokazat on famozni srednji prst, ma neće, aš je prešesna za takovu, govore da je legitimna, bedastoću. Svragun i z onen ki j to zmislel: legitimna bedastoća!! Ma, to moru samo oni, muški. Aš nih i je najviše va Sab ore i taču bedastoće kako boće na joge. A ten njin, neken, bi se isto moglo dat prave imena. Pročitala san ih z rukopisa ki se zove „ Mali čakavski leksikon“ kega iman od našega slavnega i poštovanega Zlobinara Radovana Tadeja. Pak se onde nabraja ovako:
dušogubac – čovek bez duši i ljudskosti, govorčin – onisti ki voli povedat, a more mu
se još reć i frfljavac, krklje, lajavac … itd, za ten hvirac – čovek ki je zaostal va
razvoje, a more mu se reć i da je kukavac, prduhlav, maganjan, zahiren…
Na voju van je, zberite!