Nenad Smajila nan je poslal jenu pjesmu za Dan planeta Zemlje, z ke se vidi da nan je, nažalost, ekologija još vavik na isten nivoju, kot pred 50 let. 
Na krȃj sȇla, mȇd Kȕćankinu i Kȕnsljovu hȉšu,
je Vȅlika dolȉna.
Na prîliku bi rȅć, dolȉna kȍdabi sȃka drȕga,
mȃlo vȇć širȍka, dimbȍka, škȗrija, zarãšćena i dȗga.
Mȁ ne samô dȃ je vȅlika, je tȗdi najbogatȉja,
i najsigurnȉja Pȃška dolȉna u cȇlemu krȃju.
Dȕgo je bila sȃma, dȍklje je nî utkrîla sȇlska mularȉja,
kî se je nȗtri jigrȁla i užîvala u sõjen rȃju.
Kȁda smô zȃs škôle prîšli, tôrbe smô sȇ zãjdin rîšili,
na hȉtro smô ničȁ pojȉli i pod kostȃnj se zaletȉli.
Na lȃjštu Peretȍvu posedîli tȑ se skȕp dogovorȉli,
čȁ ćȅmo danȁs počȇt?
Ȁko nîsmo jimîli nȉš u plȁnu,
u Vȅliku dolȉnu smô šli bȑbat stȃru krȃmu.
Nȃšli bî pȇglu na žrjȁvku, kotlȉć za palȇntu, nîmški šljȅm,
klȉšća i bȃt, mȁ nî, da nî bîlo stvȁri, nî se za bȁt.
Sȇga »vrȁga« smô vȃn zvũkli,
ča nȃši stȃri su nȗtri zavũkli.
Kȁda su čȉstili jȗgna, štȃle i hȉše stȃre,
sȅ su tȇ krȃme u dolȉnu se dȃle.
Nôna je vȁvik govȍrila: »Ne hȍte u dolȉnu, aš nȗtri je mȁh,
prijȇt će se vȁn za gâće pa će vȁs bît strâh,
nȇćete mȍć vȃn, ostȁt ćȅ kȋ nȗtri prestrȁšen i sȃm.«
Za tîn nîsmo nȉč abadȁli, aš mȁha ni strȁha nîsmo se bȃli.
U dnô je vȅlika umidȃnca i hlȃd,
mȁh je bil vȅlik, mȅgak i mlȃd.
Dôli smô tȗdi rôžice brȁli,
za 8. mȃrač jîh nôni i mȁmi podȁli.
Dolȉna je vȁvik ostȁla îsta,
danȁs kȁda glȇdan opêt nî čȉsta.
Nȗtri je ostȁl prâvi, mȉčkin mrkȃt,
nî je stvȁri dȃ je nȅ bi bîlo mȍć pojiskȁt.
Vȅlika dolȉna na krȃj sȇla stȍji,
mularȉju vȃbi, mȁ nînega nî,
dâ bi ȍpet u njȗ šlî stvȁri jiskȁt,
takôve kȇ nĩma danȁs nî mrkȃt.
Pasjak, 18.4.2024. Nenad Smajila, mag. arh.
Tumač besed: sȇlska mularȉja-seoska dječurlija; bȑbat stȃru krȃmu-kopati po starudiji; jȗgno-
spremište oruđa; gâće-hlače; umidȃnca-vlaga; mȉčkin mrkȃt-mala tržnica; vȃbit-mamiti.