Vlasta Sušanj Kapićeva ovisti j’ tekst napisala za izbori 2020. leta, kad nas je ćapevala korona, a i doma i va svete se j’ mešalo kot i danas. Pasal je celi mandat od onisteh na Markoven trge, a ni se čuda tega promenilo. Kako kad zamete stare novini pa van je smešno kako se svet niš ne menja:
Bili su nan obećali pulitičari da ćemo se va samo mesec dan vraga rešit, njih! Izbori su bili pred vrati. Od onda govore da je najzad prišla doba za nov početak, nov uzlet i let, za se novo od novega i najnovejega … a se na stareh facah i još potrošenejeh besedah. Ah!
Pak mislin; ča ti j vrag?! Vrag je rožica! Lepa i mila rožica kontra temu vremenu do kega nan je dočekat za poć na izbori. Sreća da je najzad pred vrati i to vreme. Dosad se je govorilo samo od koroni, od sad samo od izbori! Pak bi mi
rabilo i si pisani i elektronički mediji opet pozapret, da mi ne napunjuju glavu z bedastoćami. Još i radio milevu, aš ni ona se ne more fermat! Namaja i pul kafa i pul čaja i na place va rede na dva metra dugo, kadegod i čagod ma govorit mora!
I tako si neč misle i govore. Neki na dugo i široko, neki malo pomanje i usko. A oni neki, da ne spominjen preveć, nete ni poć glasat, aš da te si zajeno znat ka ura je z njihen glason. Bome ja ću poć dat svoj glas, aš sako četrto leto to mi je kodabi jena lepa satisfakcija, da ne rečen da tečen, aš san dočekala on blaženi časić kad ću zaokružit neko ime! I
opet briga: kemu ću dat svoj glas? Ako moj glas bude ikoliko vredil, mislela san ga dat za nekega novega, mladega, od friškeh, z dobremi misli. A onda je vranić zavrel i zakuhal: zač sa ova sranja pustit nekemu novemu, kemu će cel mandat pasat prej nego ni počne neč delat. Neka vranići, ki su dosad se zmešali, lagali i tako dobro manovrali za
svoje katridi, neka ovi stari ostanu! Pak neka do kraja odbave to ča obećuju, aš bojeh od njih ni! Pak i ni, ako ćemo pravo. Tr ki najboje zna razvrest se bedastoće ke su dosad navrezali?! Jušto oni! Samo ako bi oteli!
Govorili su nan i namajali čagod su sami zmisleli, još i korona njin je pomogla za pametovat do neba. Neka j vragu pravo, zibrali su dobri stručnjaki i jeno malo su držali zajik za zubi. I se j bilo dobro dokle ni počel govor od izbori. Pak i sad opet govore, obećuju, karaju se semi ki ni njih i za njih, potežu stare i neke nove štorije na sunce: Ne moren ne gledat i vidin da su zamisleli baš dobar scenarij za dobro svojmu narodu.
Svojmu narodu, a nas, obični narod, drže za moni i misle da smo toliko pozabjivi! Prodavaju nan domovinu za ku su sinonim njihe, ča će reć svoje katridi, svoju korist drže jenaku za našu jubav za domovinu. Tr nismo ni ovce ni koze, da nas moru samo tako za špag potezat. Nismo, ma oni misle da smo! Kamo sreći da smo! Bilo bi nan lagje probavit si njihi „izvanredni i izvanserijski“ plani. Ovako se moremo spasit samo ako ih ne gledami i ne naslišamo. Još neki za nas ovudnjeh govore da smo takovi aš ne znamo ča j dobro, za manjine reču da ne govore po hrvaski i još manje znaju ča je ča. Ča su ti judi z Marsa pali?! Pridu h tebe doma i onda bi još prigovarali! Ne moreš verovat da čuješ baš to ča čuješ! Ej!
Ekonomski stručnjaki povedaju ipak malo drugačju štoriju. Govore da nećemo tako brzo zilest z ove siromašćini, aš i cel svet slabo stoj i ni nan ki pomoć. Naši OP-egejci svoju robu dele, nose ju sami okole, davaju po manjoj cene. A cena nikad veća! Se je podraželo. Kompir je opet z uvoza opran i va vrećicah, suhega fažola je kad na njega natrapaš, mošnjice i grah su z nečigovega leda, ma ne z našega. Rožice već nijedan ni ne kupuje. Ni sprogodi nisu više ča su bili. Ni ženidbi, pak će se baren neki, ale neka, škapulat! Baren neč! A najviše ča judi veseli je opet poć na sveto kafe! Magar je dosti na dugo.
Najde se još vavek neki ki je posensega kuntenat i doma. Gleda va nebo i pun je ufanja da mu neće grašica opet lehu
potrt. Gleda va rane črešnje aš ne bi bilo dobro da se raspucaju od mokroti. Gleda i va plevel i mej njin zbira salatu i radić za obed sakidajni. Neku dobu zapolne al kvečeru, koliko ki zdura, posede se pred televiziju, zame kakov baškotin i ki kušćić cikuladi polabazne, aš cikulada nosi, zdiže i drži sreću povajer! Serotonin! Sere Tonin ale ne, sakidajno živjenje bi moglo bit dobro za sakidajnega čoveka. Jur to ni neka vela stvar! Ja, ma naši pulitičari vide vavek neč drugo. Povedaju trećo i četrto, a nan ni nego svojo naprvo mislet; kako preživet sami sobun i š njimi jušto takovemi. Keh smo zbrali i opet ćemo zbrat kako da smo z Marsa pali drito na trdu i nemu glavinu! Pak mi opet misal pobegne: imaju pravo, ti pulitički vranići, držat nas za nemeh, tr vavek ih takoveh i zbiramo!
Pak opet naslišan, aš mi v uho tule: zakon o privatizaciji ćemo … ma majku milu ćete, tr ga već dvajset let ne morete na red stavit. Ča to neki more rešit?! Bi mogal da će, ma neće, aš se saki, a pogotovo ppulitičari moru š njin pokrit. I rabi njin jušto takov kakov je. Poboljšat život? Proizvođači su se već sami zmisleli: voze, nose i dele svoje, samo da ne propade vas njih trud. Rekla mi j neka nona svojni: će te navadit redu teta nevoja!
I tako, štorija do štorije! Najnoveja je … ka je najnoveja … Pulitičari meju naprvo od Zakona od korupcije i Zakona od
sanacije porušenega Zagreba. Ča su dosad delali? Kako i vavek, niš! Ako su čagod i naškrabali ni bilo nijenega za odnest na tiskaru, aš … ma, ki zna zač.
Malo veselja ipak nosi delo od oneh ki nikad i nisu plaćeni, kapac nete ni bit, za ono ča od srca delaju. Delaju zarad našeh domaćeh velikani keh pozna cel svet. Program va čast 140 letnjice rojenja Ivana Matetića Ronjgovega i šezdesete letnjice od njegove smrti va Kazalište ni mogal zać. Pak je sejeno dobri duh zmislel dobro mesto i lep način za pokazat nan našega istarskega kanta ćaću z njegovemi besedami. Muzičko dogajanje pod imenon „Mlado vino, stari kanat“ dočekat će najlepši rečki trg: Municipij. Zakantat te četiri pjevački zbori, čitat će se z Matetićeveh pismi va keh je svojen poznaten svojni povedal ča i kako dela i zač se ćuti tako slabo va sen ten dele. Se to odbavit te zarad Matetićevega velega tištamenta od naše narodne muziki i zarad nas najboji od najbojeh. Od oneh ki sopu do oneh ki kantaju i govore onako kako je Veli Majstor sam zapisal. Pak će od tega bit još čagod rečenega i zapisanega. Poišćite va keh novinah, pogledajte na nekoj televizije. A dokle se opet epidemija vrnja aš da se ne držimo reda … Poznata štorija, rad ke bi rabilo poć nekemu dat ta glas, a morda ipak ne. Vranić vrta naprvo …
Za sreću neki se sejeno trdo mej sobun drže, ne pači njin ni izborno vreme ni govori od bedastoć i mržnji. Ne zdiži nikakov prst, magar je i to legitimno, govore oni ki znaju. Ma ni lepo! Ti neki drugi ruki su sklopili va čvrsti stisak, preklopili prsti i ne pušćaju ono ča j našo, ča j najbojo i po čen nas, magar ni kovid, po celen svete poznaju. A poznaju nas samo po oneh pojedineh ki su svojni se svoje muki i trpjenja pretočili va najlepše besedi i predali nan ih da tu lepotu naprvo davamo, va neke nove ruku, va mlaje i zahvalneje ruki, za neke vremena va keh nas neće ni bit, a ti pojedini te naprvo stat zapisani, kako ča su i sad, zapisani va Povjeste i Dele Lepe Naše i cele nan Materi Zemji.