Autor: Jelka Žilić
Z kuharice Jelki Žilić “Va kotliće zmešano” zneli smo recepti od tikvic, aš sad njin je veli štajon i puni su jih i vrti i placa:
Tikva, tikvica, buča, bundeva, misirača, dulek, bijela buča, žuta bundeva. Našla san i latinski naziv cucurbita pepo. Ta naša tikva – pepo, prišla je prek mora kot i čuda druge hrane. Negdere je zapisano da prva vijest potječe od Kolumba 3. prosinca 1492. leta. Neboh Kolumbo bil je va Merike, da brižan ni ni znal, ma je tikvu pripejal. Europska kuhinja najprvo ju je koristila za blago, malo pomalo zavukla se je i na stol.
Danas ću van preporučit nekoliko recepti. Provajte, ako još niste morda ni znale neki novi recept, aš od tikav se da tako puno improvizirat da saki put otkrivamo neč novega.
Ča se moremo kuhat? Se! Od juhe do slatkega. Saki put ću uz recept povedet i od kakove tikve se ča kuha. Najveć ćemo kuhat duge bele i zelene tikvice; vele, mesnate narančaste bundeve i jako duge zelene tikve. Našla san podatak da je ta tikvica ku najviše imamo va našen vrte prišla s posema drugega kraja sveta – iz Indije, pa je najprvo rasla na Molučkim otocima, a onputa preko sjeverne Afrike prišla h nan.
Krem juha od beleh al’ zeleneh tikvic
Za sa jila tikvice moraju bit mlade.
- Pol kila tikvic
- dve žlice uja
- žlica muke
- jena mića kapulica
- petrsin
- sol i papar
- litra i pol vode.
Tikvice olupimo, prepolovimo, znamemo paškvice. Nasjeckajmo ih na manje kockice. Na uje malo prepržimo kapulicu (samo da ovene) i na to stavimo tikvice. Obrnimo ih par put, pobrašnimo (žličica muke), podlejmo z vodun, posolimo, malo popaprimo i kad provre (okolo pet minuti) dodajmo sitno narezanega petrsina i pest riži. Kad su riži “al dente” juha j’ zgotovljena.
Tikvice na salatu
Zamemo pol kila mladeh tikvic (pedalj duge). Vode toliko da tikvice va njoj plivaju. Posolimo vodu i kad zavre stavimo tikvice. Neka kuhaju okolo deset minuti. Delikato ih znamemo i stavimo na sito, na lahko ih probodimo z pirunon na dva-tri mesta i pustimo da se ocede i ostude. Narežimo ih kot kumari, poujimo, pooctimo, popaprimo i posipajmo z malo sitno rezanega petrsina i tri režnjići sitno skosanega česna. Provajmo, ako su dosti slane. Za oneh ki su na djete preporučan ovu salatu i pire konpir. Neka odstoje okolo pol ure va frižidere.
Delikate tikvice
Kad tikvice narastu na pristojnu veličinu od malo većega pedlja, odrežite njin vrh z jene i z druge strani (skoro da ih ne rabi lupit, aš su jako mlade). Prerežite ih na pol (neće bit ki zna ča paškvic), malo posolite i pustite da otkaplju vodu na site. A onda ćemo ih parićat slično “pazinskoj puretine”. Za familiju od četiri člana zamemo za sakega po dve tikvice, a za oneh ki vole malo više jist moremo i više.
Rabi nan:
- osan landic na tanko rezanega pršuta
- osan landic sira (onega va karticah za tost)
- dva jaja
- malo cveta
- mrvice od kruha
- uje za pohat
- čačkalice
- Kad su tikvice otpustile vodu stavimo na saku landicu pršuta i sira, poklopimo z drugun polovicun, probodimo z čačkalicun z jene i druge strane tikvice, zavaljajmo je va muku, pa onda va dobro stučeno jaje i mrvice od kruha. Lepo se to skupa stavimo na ne jako vrelo uje i spohajmo z jene i druge strane. Kad su pohane, a to je brzo, posložimo ih na harteni tavijol da otkapje uje. Moremo ti dan za obed kakovu juhicu, pire, al’ riži i pohane tikvice. More i mlada salata. Videt ćete, obed je jako dobar. Važno! Prej leh ukućani počnu jist, objavite da se čačkalice ne jedu. Neka ih znamu, a moru ih stavit i na kraj pijata, morda te in rabit.