Piše: J.O.Hrvatin
Mladi z Dolanjega kraja složili su se storit nogometnu družinu. Zvat da ćeju se “Složni” aš da prez sloge ne bi prišlo do tega. Ja, triba jigrat prvu utakmicu, proti kega lego proti prvih susedi, ko njih premožeš si prvi u selo i to ti je najbolji vritnjak naprit.
Jigraju proti veterani z Goranjega kraja, ki su saki put lego jigrat delali korše po selu, do Korte pa livo po putu u Podorihe. Legli su natla i zas nogami delali kriš, kraš kako da voziju bičikletu, pa su jih si u selo zvali “Bičiklisti.“
Dolanjci po danu teču po selu gori-doli, strašiju da ćeju Goranjce premoć kako jih ni još nidan, da ćeju njin divojke i matere jokat ud žalosti pa da ćeju se morat skrivat ud sramote. Pred noć Goranjci su štrkali po selu, po Ulici gori pa nazat i kričali “naša krv – vrajža krv.” Teču Dolanjci i kričiju “složno – ćemo jih.”
Dica su prezela kričanje ud njih pa kada su jeni zakričali “naša krv” ona su udgovorila “vrajža krv”, a druga dica na “složno – složno” udgovorila još jače “ćemo jih.“ Selo je razdeljeno, u selo je haluj. Ljudi govoriju da uvi mladi su složni i da ćeju premoć. Samo je jedan čovik vavik jenako udgovaral “morda, morda” ma mu nisu vervali, aš on je i na pitanje ko sunce sviti govoril “morda, morda.“
Tega dneva jigrači i hlapci su rano dognali blago u štale. Jigrá se u najveću kortu u selo. Publika, staro i mlado, ženske i muški posložili su se okoli po zidih, krovih, navrh murv i strih. Niki su gledali čaz okna, ali z baladura sojih hiš, a i starije ženske i none su kukale i špegale čaz fernike, aš tega da poli nas još ud zadnje vojske ni bilo.
Pod strihu, na pod zgora štale selskega butigera, u seno su se skrili fanat i divojka. Jušto ti dan su si zbrali za potrdit si soju ljubav.
Zad za štalu tri frkolasci prtili su se po lojtrah navrh slamnega krova, aš da ud tuda se najbolje vidi korta, samo da moraju mučat da jih gospodar ne vidi. Seli su jedan do drugega i prprávili bazgove bonfule i fraće. Ni bilo mladega ki ni u žep spravil niča “municije”, kakovu zelenu češpu, amulu ali kamičić.
Navrh krova mir ni dugo dural. Jedan je potiho pital: “Ča biš raje jil-cucin drek, ali tombolovo jajce?”, drugi je rekal “smo rekli mučat” , treti je drcnil drugega, uvi ga je počel žegaćát, pa još z gać spustil jenega ki njihovin noson ni pravo storil. Počelo je prehtanje “Ki ga je?” – ” Ki ga zglasi, ti ga sklabasi” i “ni je riti ka ne shiti”, pa rićanje, porivanje i valjanje se doklje si tri nisu hljusnili na pod, u seno, blizu mladih “morozi.“ Oni su komoć počeli utpirat vrata ud raja.
Fanat, vas crljen i razburen, je zarulil jezno: “Pet misci već čekan, sada, …sada, ja si moran srce uhladit, ki će bit prvi?” i je zagrabil vile. Divojka je branila, áš da neka ne dela još veći haluj, njoj da je već dosta sramote. Potegni jenega, potegni drugega i sih pet je storilo jeno klupko. Klupko je tako prišlo preblizu škulje čaz ku se meće seno zas poda u štalu i si skup su propali doli, kako seno, tako oni.
Goveda su prestrašeno mukala. Butigerov sin jih je zaradi utakmice pozabil nafutrat, a sada su morala trpit i uvi strah. Dva frkolasci su pali na brižnega telića, ki je jušto cical. To je raznemirilo njigovu mater Moru, počela je rićat z nogami i tulit i za pol hipa gaće su njin bile se rascunjáne.
Ča se dogaja u kortu? Vrata ud prkata su bila gol, na drugu stran su pod zid dili dva kamika i to je bil drugi gol. Za suca su zbrali seljana ki je delal kot matičar pa da je prložan za suca, aš da pozna sakega jigrača utkako se je rodil. Namesto fićkale til je donest škrbutávku ma da mu je zniknila još zadnjega pusta, pa su mu donesli zgon, lip, velik brunac. Bala je krpena, ud ubojki, nutra veje.
Vratari su već si črni kot da su vragu s kotla ušli. Vrataru Goranjci bala je tri pute podletila zmed noh, pa u prkat, pa malo niže u gnojnicu. Brižni prasci, dva mičkini i jedan veći, cvilili su sakiput kada je bala bubnila u vrata. Tri pute je je vratar znimal z gnojnice i brisal. Publika je kričala “hote i vi bičiklete vozit “, pa “pridi h meni, ću te ja zdignit” i takove.
Ja, zazgoníl je sudac i četrti put. Énac je za Goranjce, veseliju se i kričiju da bravo matičar, mladi kričiju okoli “naša krv” a njihovi jigrači “vrajža krv”. Dolanjci biju tili storit barufu ma suca su oni zbrali pa jih je umiril.
Enac će pucat najveći krik u selo, znani barufant, nu, ne baš prešegáv. Stiskal je punje, štiknil se nazda se do sojega golmana. On mu je zakričal “daj ga”, a njihovi navijači “daj ga, daj.“
Bala, sa rascifrana, nedužna, poležena par koraki ud prkata, čekala je barufantovu nogu. Zazgonil je sudac najjače ča je mogal. Krik je stiskal punje, pa ga je vratar Goranjci prestrašeno gledal. Pucač se je zaletil i migljal z oči tako strašanski da je zadnji čas zagledal balu. Zas škarponon je bubnil jedan kamik poli bale, zrušil se je i zastokal “Aj joh, gore meni, brižna moja noga, sigurno san je zlomil, morda i zvenil.“ Balu je jedalik dregnil, dal njoj je kot da bi jedan vritnjačić i vratar je je brže-bolje stisnil h sebi.
“Ajojić” je utšepal h dobri stari botri, ku su držali za štroligu. Dala mu je jedan “brufen” ki da njoj je ustal ud pokojnega, škoda da tableta propade, je rekla. Dala mu je i frakulić češpove rikije pa je zaspal.
Ča je bilo z Dolanjci? Celu Božju noć su jihuhali i vragali poli uštarice Francke i kričali, jeni “složno”, a drugi “smo jih.“
A Goranjci? Nu, njin za pit ni bil kraj udzat, plaćivali su Dolanjcon i sojin i uvako jiskali škužu: da se ni unako šundral moglo je bit 3:1, pa “da smo samo prvi zabili gol mogli smo premoć mi njih, šundrat zasinsega”, pa da triba premundat zgon i suca, to da je prvi i zadnji put da njin on sudi, a zgonu da je mesto u crikvu, ali u štalu. Još su govorili da su za se krive ženske, ač da njin je mesto u hišu, nogomet da je muški sport, da je za ljude, a ne za ženske. Ja – i da je sunce krivo, da je uprlo vrataru u oči i da ni balu ni vidil.
Najpametniju je zrekal njihov najstariji, malo plešiv kumpanj: “Za se su kriva goveda.“ Goranjci i Dolanjci počeli su se zagledivat, pa pitaju šegavca: “Zač goveda?”- “Zato, aš da su ustala na pašu, ne bimo ni mi šli doma pa se tekma ne bi ni jigrala. Uvako je bilo pravo njin i nan, goveda su ušla ud muh i badini, a mi smo jih veselo dognali doma i šli balu jigrat.“ Zato da su zgubili i samo šli trubila prodavat.
Jeni i drugi su ga pohvalili, da on vavik reče malo ma pravo, ma i migljali jedan drugemu. Najedanput su se si držali za trbuhe i zvijali ud smiha.
Uštarica Francka dobro je pregruntala da potlje smiha i pijače najveć puti pride do barufe, aš jezni i pijani biju se sprehtali i potukli, još njoj ča potoftali i mogli poć ća prez platit. Zela je metlu i se počela grozit žnju. Jedan za drugin su se pobrali van.
Lahka van noć sin skup, spite dobro, van “brufen” još ne rabi, češpova rikija vas čeka poli Francke, a i blago je za zignat rano na pašu. Reče se da ko ljudi ča sklabasiju da brižno blago ni nič krivo, ča ne da je tako?
Bonfule su bazgove pukalnice, kukat i špegat je viriti, fernik je zastor na prozoru, prehtat se svađati se, žegaćát škakljati, potóftat porazbijati. Škarponi su cipele okovane brukvicama.
Dičja pitalica: cucin drek da je med, a tombolovo jajce ud breka jajce. Ki zbere jajce, se zna, mu se smiju.