Ni tako dugo da smo va našeh umejkeh na pute trefili beli kombi. Ni vozil migranti, ma mi se vidi da j’ nutre imel smeti keh se otel nekako refat. Stali smo na pute i čekali da vidimo ča će bit. Čovek se j’ iznerviral ča žbalimo va njega pa j’ stal, zišal vanka z kombija i počel zmamit – da ča snimamo, da ni on kriminalac, da neka ga pustimo da žive. I ruki j’ zdigal na nas. Bimo ga pustili, lego ča, da va našoj šume nisu hrpe smeti, a kad jenu počistiš, već drugi dan je tu druga. Malo j’ još zmamil, pretil nan je, pa je pasal ća.
Reciklirnice, spalionice, mići otpad, veli otpad, se su judi nekako osmislili i još se domišjaju da se te silne smeti nekamo posprave. Znamo da nećemo spasit svet ako plastiku hitimo va plastiku, a hartu va hartu, ma smo storili svoj mići doprinos za čišći Kvarner. Zato čoveka i boli kad vidi umejki puni smeti, od judi keh ni briga ni za Kvarner, ni za planet, ni za čistoću. Ča bi rekla naša mat, ne vidi daje od nosa.
Ova tabelica ku j’ snimila Silvica Ahel Tintor va svojen omišaljsken kraje govori se od oneh ki hitaju smeti va umejki. Samo j’ velo pitanje – da to i pročitaju, bi ča razumeli?!
