Evo j’ prišal i advent. Ovo j’ mesec od tradicije, od dobroti, od stepjenega srca, ma i od velega šopinga, hlujenja okole, mesec od šašura, gužve i nervoža. Za čuda judi ni lepšega meseca va lete lego ča j’ ovisti, predbožićni, ma je i oneh ki padnu va depresiju od sega tega glamura i potekevanja za srećun. Advent je danas lih jena ludnica. Kuliko se j’ tega okol adventa i Božića promenilo va zadnjeh sto let, ne rabi ni govorit. Za oneh ki bi rada znali neš od tega vremena, prnašamo tekst Ive Jardasa z knjigi “Kastavština”, o užancah kakove su bile pred jeno celo stoleće:
Vreme od prve nedeji za Katarinun do onega ćedna, va ken je Božić, zovu va Kastafšćine advent. Va advente j’ ovako po nedejah tužno, aš ni tanca, kako j’ od Bele nedeji do Katarinini. Na zadnju subotu pred advent su zadnje nevestice ale zadnje ženidbi. Va kućah, kad j’ stočišće, va advente počnu već koledvat, to će reć kantat starinske božićne kantuneti ale koledvi. Ne samo “Kate Katarina” lego i druge.
Sako jutro j’ bivala va crekve pul svetega Mateja “zornica”. Na zornicu i zornice grunuli su judi koledvajuć, se trupa za trupon. Jedanput su šli Mate Šendikov i Andrina Roškićev koledvajuć se do crekveneh vrat koledvu:
“Tri kraji jahahu”.
Na vrateh su fermali, a koledva ni bila finjena. Pop, pre Jure Premuda, da j’ rekal: “Korajo, fanti. napred, napred!” Nutar va crekav se do pred oltar su šli koledvajuć.
Va crekve su va advente koledvali:
“Poslan bil anjel Gabrijel
Od boga va grad Nazaret.”
Va advente stave hmeti celu repu kisat mej drobi. Deju, da se najboje drži repa, ka se stavi kisat va advente; ta da se ne zbersi i da ne omekne.