Piše: Darinka Leprinka
Prvi put va Leprince, a dvajsetičetrti put od kada je krenula z Kastva, va punoj sale našega Doma, a va organizacije KDL, održana je pasanu subotu Ča Čitalnica.
Prišli su na svoje si ki uživaju va našoj čakavice ka od kuda god da prihaja jednako uhu ugaja. Pridružili su nan se pisci i pjesniki z Lovrana, Kastva, Reki, Krka, Opatije, z Kraja, Kukuljanova, Grižan i od Matuj. Bome prvi put va Ča Čitalnice oglasili su se i tri Leprinčani. Skupili su se judi ki radi podele z drugemi svoje uspomene, svoji doživjaji, svoju zapisanu besedu i svoj govor.
Mogli smo tako čut štorije od vremena ko j pasalo, i od judi ki su nekemu neč značili, štorije od tega ča se saki dan dogaja, do tega ča storit za nać sreću i svoj mir. Pjesmice ke govore od jubavi za svoj kraj i žal za užancami ke se zatiraju, a mej sen smešice i škerci ki se vavek dogajaju.
Nasmeli su nas i zabavili, Neven Barac i naš vječni Dule i Bonaca.
Na zadnjen, za seh va sale bile su parićane slašćice i to na način kako su to delale naše none – kuglofi i supice, ulenjaki i kroštule…Za ovu priliku frigala je i pekla vredna majstorica, rojena Leprinčanka, Nada Klementova.
Ostat će spomen na lepo pasan večer va dobroj kumpanije.