Poveda: J.O.Hrvatin
Milan Bačić pjeva: jesen je i vjetar grane njiše, sjedim sam ti kraj mene nisi više…jesen je i zadnje lišće pada…o Mirjana…
Za mislit je na se Mirjane kin je namenjeno, a jesen je pa me domišlja na zeleno, tr to je najlipša ma su i druge farbe jeseni. Ćemo se domislit na farbe sih sort kakove su bile jeseni jedanajstega misca.
Priroda nan je namenila snih i belu. Jušto doklje sastavljan gledan na Učku, petak je dvajstidrugega novembra, dvi zapodne, a belo do pod Leprinca, i Orljak nad Rukavcon.
U Preluk je bila narančasta od kaki, a poć u Kastavsku goru pa se ubrnit proti Gradu okoli su jesenske. Turan štrči ma desno je most i plavina našega mora jadranskega.
Još malo u goru i po kastavsku “lukići” kakove se ne pobira – buzdovani njin reču, a je i prosenjaki, po slovenski ježevke, ne more se falit aš jedini jimaju jiglice pod klobukon, a dobri su skisani.
Proti Munan ćemo nać imelu ka nas domišlja na božićne dane aš da je to takov simbol. A na sjeveru Evrope da su mladenci morali pasat zdola drv imele za nać sriću. Imela rada raste na drvo mehke kore, lipice i brkulje. A tići kot tići, rada šćofnu te bele kuglice, ma kola z kuglic njin se ne pusti pa z kljunon taru kiticu na ku su skočile za se rišit kole. Tako “posadiju” u koru jiglicu z kuglice imele i drugo leto će tamo zrast još jena. Jenako će zrast ko se ponesnažiju na kiticu. A mi ćemo se veselit saki put kada jih vidimo.
Drugu vrst samo z žutimi kuglicami ćemo nać po hrastu okoli Buzeta ma tamo ćemo raje popit bisku, zas peri ud imele, tr po talijansku se za imelu reče vischio (viskijo). Vischio biska, vischio biska. Ud bobic se je delalo bisak, kolu z lovit tiće, dobro je da je sada zabranjeno. U Dalmaciju je ta navada nazvana oželanda.
Ja, na jesen će nas domislit i lip panj i slika propalega drva črišnje, slikane u Kastavšćinu.
U Mune san slikal brinj i Sonjicu, brinj jiman rada aš me domišlja na drvesce ko smo kitili za božićne i novoletne praznike. A Nju jiman saki dan.
Namesto Bačića ki pjeva…koraka nema više je bolje za napisat je sve manje.
