Prihaja vreme od prasac, magar je danas prašćevina morebit i saki dan na pijateh. Kako j’ nekad bilo siromašćini, ni se smiron jilo meso, lego kusić po nedeje. Kako j’ to bilo z prasci i okol njih, morete pročitat va knjige “Bokunić užanci” izdavača Općine Viškovo:
Za sen ten ča je prašćevina bilo jedino meso ko su jili, niki va Kadtafšćine ni imel svinju, nego su mići prasci kupovali va Grade na Praščarije. Od polovice 20. stoljeća su trgovci z Liki i Zagorja prihajali va sako meseto, a stalnen kupcen i pred sama vrata.
Praščić se je kupil od trejsetak kil, a zgojil do preko sto. Hranili su jih z onen ča su pobrali na lehe i z pomijun – ono ča se pobere po pijateh i padelah potla obeda, vodun va koj se je kuhal konpir al pašta i sl. Da bi prišli debeli, morali su fanj mirovat pa potla obeda deca nisu smela zijat aš prasac počiva i “dela salo”.
Od prasca se je iskoristilo se osin prajki (nohti). Dlaki su se rabile za škoveti, z mihuron su se igrala deca, a se drugo se je skuhalo al predelalo. Kako su nekada jedini konzervansi bili sol, dim i bura, najprej se je pojilo ono ča ni moglo stat, a drugo se je trošilo kroz leto – dokle j’ bilo. Zato je se trošilo šparno, da ča duje traje.
Prasci su se ubijali kad je zahladilo, ovisno od tega kakova je zima bila, od 1. do 2. meseca. Va staro vreme su jenega prasca ubili okol Božića, a drugega neč kašneje, va vreme pusta. Kastavci su bili navajni saki dan delat pa bi se potla Drugega svetskega rata saki blagdan iskoristil ne za počinut, nego za storit ko većo delo. Tako je va drugoj polovice 20.st. najviše judi ubijalo prasci za Dan Republiki, 29.11. Bil je to veli događaj, okupila bi se sa familija i susedi. Već dan prej bi se parićalo se ča rabi (stuba za besit prasca, kuki, kasel, zvonci z kemi se je strgalo dlaku, kotal storen od kakove stare bačvi va ken se je steplila vela količina vodi, padeli, sići i krpi).
Muški su počeli rano prihajat, a dočekalo jih se je z bićerinon rakije za steplit telo i umirit želudac aš jih je čekalo grdo delo. Prasca je trebalo dobro držat da ne bi pobegal. Zato je vavek rabilo nekuliko jakeh i spretneh muškeh. Va Halubje je vavek bilo nekuliko judi ki su se navadili kako blago ubit i raskomadat i delali su to kod bekari. Tega čoveka bi susedi prišli pitat ako bi mogal taj i taj dan prit njin ubit. Kad se je dogodilo da je više familij namislelo isti dan ubijat, bi se dogovoril pul kega te prej al je neki prehitil na dan prej al potla.
Kad su prasca ubili, osmudili pa ostrgali dlaku, ofurili su mu kožu z vrelun vodun, a onda obesili na stubu da se zicedi krv. S ten je najtežo delo bilo gotovo. Većina prasac je imela zmed 120 i 180 kil, ma bi se dogodilo da imaju i preko 200. Težina prasca bila je stvar prestiža. Kad su obesili prasca, bi ručili, va boja vremena popili i črno kafe, pa se razašli kućan. Ki je ubil, za žurnadu, to za plaću, je dobil pečanju, tj. komadić zarebrnika, jetar i špeha. Komadić bi se nesal i susedon tako da su jeno vreme si imeli dosti friškega mesa.