Piše: Sonja Vlah
Prej koroni smo kuhali na Daneh zdravlja i kulturi općine Matulji, a sada smo storili korak napred.
Prej Sportske dvorani na Šetalištu V.Nazora Udruga penzići Matuji je subotu, 19. listopada 2024., organizirala takmičenje va pripreme hrani. Ovo leto smo za kuhat zibrali kapuz i fažol.
Padeli smo posudili od Vrtića pa njin posebna hvala.
Mi Matujci z Udrugi smo dali kapuz, fažol, česan, svinjsku mast, suho meso i kumbasice. Z udrugi je saki kuhal po svoje pa su neki nazvali soje dodatke tajni sastojak.
Kuhali su penzići z Jelenja, Viškovega, Kastva, Opatije i domaćini Matujci, saka udruga po tri, a z čavjanske udrugi „Palentar“ su prnesli palentu kompiricu.
Bistrčani su poslali pravega kuhara, a i predstavili ponudu OPG-a Brkini i Zeleni kras. Moglo se je kupit suho meso, sir, jabuke i drugo voće, kapuz i kompir, med i proizvode od čel. Cvetni med je bil po 12 eur, šumski po 14, jabuke 13 kil po 18 eur, a pet kil 7 eur; kila hrušav 2 eura. Kiseli kapuz su najveć kupovali pa je vozić šal več puti va kombi.
Najveć zaslužne, kuharice, su povedele da su zadovoljne aš da su hvalili si ki su jili. Pasalo je 150 pijati plus šest za provat (žiri).
Na kraje su objavili ku hranu su najboje ocenili. Pijat sake udrugi je imel soj broj. Na prven meste su Halubajci (Udruga Viškovo), drugi su Matujci, a treti Bistrčani.
Vreme je pomoglo i ovega puta. Zasjalo je i sunce pa je zadovoljstvo radi puno ljudi još veće.
Na prvoj slike je brgujski kapus, i on je posebnost sojega kraja pa, ko ki će, more mešat kiseli brgujski kapuz, fažol i suho meso pa još dodat gromišku kompiricu, alaj uživanja.
Hrmenta z Martinovega sela, vredne ruki kuharic i ne more se ostat lačan. Niš ni boje od palente kompirice!
Sen ki su kuhali smo darovali tavajol, a sakoj udruge knjigu Matujska kuharica.
Za dve zadnje sliki hvala Nade Šepić.
