Va ovo predbožićno vreme z Škabelina smo zneli štoriju Enice Mićić od božićneh užanci z Pasjaka. Ona ju je povedela va emisije Ne pozabimo na Radio Rijeke, pa skupa z ovun lepun štorijun na kraje morete i poslušat originalni zajik z Pasjaka.
Piše: Enica Mićić
Do mojega dvanajstega leta, do 1960-ega, san bivala u Pasjak, poli Srdetovih. Susede, strina Marija Barburina, Roza Srdetova i moja mama Danica su se uvako pogovarale:
Dana leto gre h kraju, dani kot da bižiju, još ne misec dan pa je Božić i Novo leto. Moramo priškrbit urihi, maslo i suho grozje za speć ubaticu. – Nu, meni ćeju naši z Brc poslat masla, je rekla strina Roza, a mama njoj je dodala da pravo govori. – I ja san san naručila maslo, ud Belanovih, grozje jiman, a urihe će mi dat sestra Mima aš Neškini jimaju urih. Jiman i fanj lišnjaki ke je je nabral naš ćaća Jive. Ja, ja, greju posebni dani.
Moj nono Kućankin nan je vavik prvi naznanil da prihaja Božić. Unako pred večer je prišal z drvenin kufron punin lišnjaki kega je bil donesal doma z Merike. Za škerc je žnjin zduga rošćal, a mi smo tekli van z hiše, aš da ča je to. Rekal nan je „Na, dica, pa tuc`te i jite.“ Lišnjake je pobiral doklje je čuval blago.
Brat Orlando i ja smo se zajno prijeli dela, tukli lišnjake i hrustali.
Mamu san popićivala da zač su posebni ti dani ki se komoć čekaju.
– Hćerka, na Božić se je rodil Jezusić, u štalicu poli blaga, a poli njega su bili i Sveti Tri kralji.
Zamišljala san kako je to moglo bit, aš ja san se rodila u rodilište, u Riku.
Mama je još gruntala: triba uribat daske ud škal i kambre, uprat koltrine, a čentriniće za pod ljuč i uru poštirkat i popeglat. – Ću speć ubaticu, sladak kruh z grozjon, i štrudalj ud jabuk ma prvo sega rabi celu hišu usnažit, a i okoli nje, ma tudi poli poli blašca da i njin bu čisto aš smo jimili kokoše, kozu i prasca
Gospodari su pr`pravili malo već trešćìc za znitit uganj i nasikli već drv da bu dosti za se praznike aš ni lipo te dane zimat sikiru u ruke i rompat.
Kada se je rabilo ča zaposudit su užali reć da ćeju dat „ud malega malo“, nisu storili ud manje. Ljudi su se držali stare navade da posujilo jišće vraćilo, pa su do Vilije Božje se posujeno vrnili.
Vilija Božja je bila posni dan pa se je skuhalo pr`žganu juhu, friško zelje zafriženo na česan z već papra i fažol na salatu. Da bu kriplje se je skuhalo palentu. Tata je delal u Riku pa je užal z mrkata na Brajdu donest slane ribe. Mama jih je uprala ud soli, zafrižila na ulje i skuhala palentu, a kašnje se je namesto slanih rib užalo kupit ribe zas škatulete Delamaris, Izola.
Za fruštik smo jimili belo kafe, kruh z marmeladu, a za večeru ča je ustalo ud južine. Mama nan je sfrigala i krofe ud testa ko je zamisila za speć sladak kruh. Razvaljala je testo i zrezala na kvadrato pa storila i spekla krofe. Tako smo jimili za jist krofe i sladak kruh.
Na Viliju Božju smo navečer kitili drvesce. U goru se ni smilo sić jelvice ali boriće pa je tata našal lip brinj i zas cveki ga zabil na panj. Pokrili smo ga z mahon kega smo šli nabrat.
Kuglic za ukrasit drvesce je bilo malo, najveć smo ubisili bumbone ud cukra, podugaste, zavite u belu hartu, na kraje nacifranu. U usta su se topili. Bilo jih je zelenih, plavih, crljenih, srebrnih. Ubisili smo jih z zaveženin končićon. Tata je užal ubisit i naranču. Na kitice ud drvesca smo divali vatu da zgleda kot da je to snih, a na mah dili ko janjece ali angilića.
Na Božić su rano ujutro prihajali polažari. Polažari su bili muški.
Mama se je stala rano, zložila uganj da se hiša zgrije i užgala ljuč da polažari vidiju da je svitlo. H nan je kot polažar prihajal Pepić Kusnljov, bil je vavik prvi.
Uvako nan je Pepić čestital: “Srićan Božić ki ste ga dočekali uvo leto, da bite ga kletu i već let, zdravi i veseli, tusti i debeli i da bite nan se ča rišili.” Mama mu je prpravila ki dinar već, uni aluminijast. Mi dica smo bili već stanjeni i mama zadovoljna da nan je na Božić muški prvi stupil u hišu, aš da nosi sriću.
Mame su govorile dici „Ću vas utpravit pa ćete poć za polažara.“ Dica su šla rano čestitat, magar prvo nego u školu, ali prvo nego na vlak za u školu u Matulje (uniput je na Božić bil delovni dan). Šla su čestitat rodbini i susedon.
Ženskice su mogle poć čestitat zapodne. Dan Božića je za familiju pa su do južine muški hodili podat ruku u susešćinu, rojakon i prijatelon. Ženske nisu hodile.
Najlipše je bilo ko je Božić bil u nedilju.
Domaćini su se dici polažaron rišili zas pestju lišnjaki, urihi, kakovu jabuku, dinarić, a retko naranču, unu Jaffa zas dišeću hartu. Udrašćenemu polažaru su dali popit glažić češpove rakije.
Sa hiša je dišala po čistemu i ubatici i bil je poseban mir.
Na Božić ujutro smo fruštikali belo kafe, sladak kruh i ubaticu. Potlje je mama del kokoše dila kuhat za juhu, a drugi del dila speć u šporget skupa z kumpiron.
Ki put smo jili i gulaš ud divjega zeca aš je tata bil lovac. Za u juhu je mama bila doma storila paštu, a znala je je narezat jako na fino. Jili smo i salatu ud friškega zelja, a vavik doma zamišen i spečen kruh.
Mi, dica kot dica, smo sako malo hodili u dolanju kambru zimat ubatice.
Kada smo bili manji je mama u kambru pvo spanja z nami zmolila „Svetega Angela“.
Za božićne dane san je bila zaprosila da molimo jenega dužega. Ti put smo molili po slovenski aš je gospud, župnik Božić Božidar, bil z Jelšan.
Uvako je to bilo: Sveti Angil varuh moj, bodi vedno ti z menoj, vedno bodi mi na strani, sega hudega me brani, prav prisrčno prosin te, varuj me in vodi me, amen. Homo spat, Boga zvat, Svetin Križon prebivat, križ teče pó zemlji, Mat Marija pó nebi. Prosići molići dajte Bogu unu reč da ćete mu jerovati. Boh će tebi ključe dat. Jerovići greju z trojskimi vrati, pitaju kadi ćeju prespati? – Poli Svetega Križa za vrati. Popićivala san već ljudi ma za tu molitvicu nisu znali pa ću reć da je je znala samo naša mama. Navadil je je naš tata, Starojac.
Ta molitvica mi je bila posebna aš san zamišljala da je noć, da ti jerovići tropaju zas čižmami i da jišću kadi biju prespali. Ma, kot da me je bilo i malo strah.
Kada se je rabilo ča zaposudit su užali reć da ćeju dat „ud malega malo“, nisu storili ud manje.
Rada se domišljan kada san u zadrugu, ka je bila poli Kundinih, zagledala mičkinu ukruglu špeglicu, a nutra z jenu mačkicu. Meni se je vidilo da mačkica jima šupe oči, bile su za pravo reć dvi škuljice, a i dvi kuglice ke je rabilo da pridu u škuljice, kot oči ud mačkice. Ubrnjali smo tu špeglicu da kuglice pridu namesto oči, pa smo se mi divojčice tako jigrale ka će njin prvo storit oči. Nonotu san užala usnažit „kuću“ kadi je jimil urudje i mi je bil dal par dinarići pa san si je bila kupila.
Jigrale smo se na trilju, na kamičiće, zas pupicami, a sada i zas špeglicami.
Za Božić se i danas držin starih navad, ne jimit velike želje nego dat ud malega malo.
To su moji spomini na božićne dane mojega djetinjstva, nonotov kufrić, špeglica i se drugo ča san napisala.
Link na emisiju:
https://radio.hrt.hr/radio-rijeka/zivot/ne-pozabimo-eni-micic-o-bozicu-na-pasjake-10482586
Besede: drveni kufar – drveni kovčeg, kambra – soba, čentrinić – heklana podloška, ubatica – orahnjača, usnažit – očistiti, krofe – pokladnice, rišili se – darovali, fruštik – doručak, južina – objed, drvesce – božićno drvce, brinj – borovica, polažari – čestitari, užgala ljuč – upalila svjetlo, varuh – čuvar, jerovati – služiti, jerović – sluga Božji, špeglica – ogledalce.