Piše: Nenad Smajila
Na Domu kulture u Pasjak se je opet sviralo, plesalo i pjevalo tako kot su to deleli naši stari! Proslava je počela, kot se i spodobi zas snimku pjesme »Krasna zemljo« , ku je odpjeval KUD »Danica« na proslavi 50-let dela (1974.), tako da su srhi pasivali sin ki su bili u dvorani, kada su čuli glase ljudi kih (veći del) ni već dugo z nami. Zas malo tišine smo njin dali počast i slavu za vekomaj, aš su zadužili se generacije, ki su prihajale i još prihajaju za njimi.
Prvo nego je počel program su ljudi mogli pogledat narodne nošnje, štrumente za svirat i još puno slik, ki su pokazale da se je na »100 let dugemu prehojenemu putu« puno tega storilo. Bila je prilika pogledat Matičnu knjigu Društva zas osnovnimi podatki o članih, kot tudi Spomenicu u ku je zapisano se ča se je dogajalo u Društvu i u vezi zas društvon. U va nju se je moglo uni dan tudi ča napisat. Kada je predsednik KUD-a, Davide (Kundin) zas Pasjaka sih lipo pozdravil i predal besedu Ani Mariji (Rejčovi), program je mogal začet.
Nastupila je folklorna sekcija KUD-a Danica« zas prikazon trih plesi i to: »Čotiš, Mazulin i Paška poljka«. Ana Marija je predstavila nošnju sela Pasjak. Harmonikaši KUD-a su nas domislili na vrime kada je u Pasjak bila organizirana manifestacija »Z ramoniku po starinsku«, a Nenad (Andrijov) je povidal i se nas domislil na glavne zgodovinske dogotke i ljude – člane Društva, ki su »Danicu storili, je postavili na noge« i dopeljali do tega jubileja.
Na proslavi su bili i dragi gosti zas Jelšan, tamburaši KUD-a »Sloga«, ki su uveličali ovu proslavu i se nas domislili na dan kada je »Danica« prvi put nastupila baš u Jelšanah i to još 12.4.1925. leta.
Kada su zaslužni člani dobili Zahvalnice KUD-a »Danica« za soje predano delo, Ana Marija je pročitala pjesmicu, ki govori o dragemu Pasjaku, ud Adrijane (Kundine) sestre ud doživotnega predsednika Društva, Milana Surina (Kundinega), a Nenad je pročital soju, ku je napisal jušto za »100 let »Danice«.
Po zahvali predsednika sin ki su prišli i tako zveličali ta velik jubilej, još jedan put je obveljala ona dobro znana pjesma Orlandota (Kućankinega) »Ki će se z nami« zas ku je finilo delo prvih 100 let Društva, a »obrnjena je i nova stranica knjige«, ku će tribat još napisat u letih ki prihajaju.