Piše: Nikolina Morićeva
Danaska je plavi pundejak, najdepresivniji dan va lete. Treći pundejak va januare, magar tako povedaju, je dan kad su judi najžalosneji, nimaju voji ni mota za ča poć delat. Reče se pul nas kratko i jasno: nisan lego za prascon hitit. Va Hrvatskoj su pak još tužneji lego va drugemi europskemi zemjami. Zač? Ma ne moramo se to opće pitat, aš kad pogjedamo ovi ča pucaju z auti bočno, ovi drugi ča dižu ceni va nebo, ovi treti ča reču da j’ to tako i boh, pride čoveku za ubit se. Zato Hrvatska i ima mej najvećemi stopi suicida va Europe. Peti smo po rede, a pred nan su Slovenija, Litva, Mađarska i Belgija. Z Slovenijun se volimo usporejevat, uvde boje da glavu obrnemo va drugu stran, Litva nan je dugo pa ne znamo ča njin tamo je, Mađare znamo ki već dugo hita va depresiju, a Belgija je takova, pa boh.
Va Europe, na 100.000 judi ubije se njih deset, a pul nas 14. A i tako nas je premalo. Ča će od te brižne zemji ostat ako si mladi z decun pasaju ća, stari ostanu pomalo duret, a oni keh niš ni voja, pa ni pobeć z Hrvatske, zdignu ruku na se? Ni to samo plavi pundejak, saki dan judi se slabeje moru zdurat ovo ča se okol nas dogaja. Sen nan pomalo rabi jena terapija da bimo zdurali seh oneh ča nan po glave skaču.
Jena mića terapija bit će nan ovi petak, ako obajdemo butegi va široken luke. Kad bin videla prazni parkingi i prazne blagajne, magar malo bi mi srce bilo na meste. Aš bimo pokazali da nas ne more baš saki za monu držat. Morda ne bimo nijenega trgovca jako oštetili, ma bimo jih sejeno kapić prestrašili. Aš nisu navajni da njin neki zubi pokaže. A zubi lih si imamo. Magar i dentjeru.