Autor: Nenad Smajila
Moj nono Frane je lovac bil,
u goru je vavik zas pušku hodil.
Za saku škulju on je znal,
u ku je zec, lisica ali jazbac ležal.
Ja san se bil u va nj dal,
pa san zas pušku vavik spal.
Poli kušina mi je ležala,
da je zagrabin i stečen vani,
ko me nono zazove, aš je rekal,
da ću poć ž njin, čin bun malo veći kod lani.
I tako su leta hitro pasivala,
doklje ni prišla jena sabota jutro.
Bilo je to na drugega februvara,
unega leta kada je Tito umrl.
Nono je stal i me zazval: »Neenić, gremo!«
Zajdin san znal, ni mi tribal reć kamo?
Po noći je snig jušto malo zapal,
ča je nono i čekal, aš zanku je dal.
Pod Kunsljovu hišu je železa nastavil,
da bi u njih kunicu zvabil.
Kokošjega mesa je malo dil,
tako da ga je snig potlje pokril.
Kada je se soje pojila,
nonotovu vabu je tudi zjila.
To je bilo zadnje ča je storila,
pa kokoši druge ni već taknila.
Od uniput nan kunica zgora vrat stoji,
kodabi nonota čeka, ki ga dugo već ni.
Sada ko zdola nje pasan,
vavik se zmislin na ta jedini dan,
kada z nonoton skup u lov smo šli.
Ja san potlje soju pušku spravil,
nikada nis već lovac bil,
nono je soju ubisil na klin,
a kunica još vavik zgora vrat, dela spomin.