Piše: Nikolina Morićeva
Ča bin rekla? Danas se se neš spamećujen, pa opet pozabjan, pa mi je opet na pamete… Ča me j’ ćapalo? Oni, kako se ono reče, Alzheimer prišal na kafe?
Morda da gren ča pomit, to je kot meditacija. Te nove besedi, ne moreš već nać kako se to užalo reć po našu, po domaću… Ma ta meditacija je kot neš za mislet i za ne mislet. A ča je boje za to nego tri pijati i padelica va koj se j’ do pred pol ure kuhala maneštra. Ona naša domaća, pašta i fažol.
A sad žvelto pomit i stavit se va red, još jenu rožicu z vrta va važ na stol va kuhinje, i pogjedat kako se zapolnevno sunce ćapalo svetit nutra na nju…
A vane se more zabiva va steni, lome se vali i galebi zijaju i jade se, i kaštigaju jedan drugega, ki zna zač.
Zapolne kot sako.