Piše: Nenad Smajila
Pasjak se nahaja na samih uvinkih (kot se vidi na priloženoj sliki). Bili su toliko opasni za promet, da je već 1910. leta po makadamski cesti iz jenega, iskočila poštanska kočija z konjon. U 80-tih letih 20. stoleća se je po asfaltu, ki je bil gladak , a još je jimil i kriv naklon, zvrnilo puno raznovrsnih vozil. Mulariji s Pasjaka nan je to bilo jako zanimljivo pa smo od spomladi do jeseni po dažju hodili gledat na škarpu zgora uvinka na Kenulićih, ka će vitura ali autotreno prvi zletit z uvinka van. Jenin ljudom smo tudi pomogli izvuć jih iz vitur, a jenemu austrijskemu šoferu autotrena na žalost ni bilo već pomoći. Dugo let za tin su cestari bili najprvo zgrebali asfalt, a potlje i popravili naklon ceste pa sada visi tako kot mora bit. Nesrić za tin ni bilo već, a i viture su se posodobile. Uvi zapis je spomin na te dane, kada su nesriće bile skoro sagdanje (svakodnevne).
PAŠKI UVINKI
Čez Pasjak gre cesta zvita kot kačka.
Rep njoj za »Mali vrh« leži, a glava zgora »Štulca« štrli.
Hrbat jima kljukast i jako zvit,
kega je malo na selo naslonila i tako velik uvinak naredila.
Od uniput, kada je cesta još makadamska bila,
sako toliko se je na njoj kakova nesrića storila.
Poštanska kočija s konjon, kada je zdrsnila z uvinka davala je znat,
da se tuda neće moć samo tako, na hitro pasat.
Po zglajenemu asfaltu, spuskemu kot led,
potlje je bilo vozit tuda kot »ruski rulet«.
Kada je daš jušto malo porosil,
uvinak zgora »Kenulića« se je u poligon spreubrnil.
Mulariji nan ni bilo lipše, kot na škarpu zgora uvinka čepit,
i doli gledat, ka će vitura ž njega prva vani »sfrlit«.
Kamijoni stari, brez servo i ABS-a jimili su samo žlajfe na zrak,
pa kada su se prehitro spustili, kola njin je valje ubrnilo naznȃk.
Uvinak je zato »črnu točku« dobil,
ma austrijski šofer auto trena je seglih uvanj soje življenje pustil.
Japno, konjići za strihu i pločice rjave,
tu su na soju zadnju put pristale.
Uni, ki je »Kenulić« zdelal, je pod selo na »Drene« opet priliku jimil,
z uvinka vani »sfrlit« in na škarpu se potlje naslonit.
Tu ni bilo tragičnih nesrić, bile su samo komične i za selo ekonomične.
Kada je bire bil pun uvinak, doma ju je nosil i najmanji sinak.
Jenega dne smo mulci z vlaka čez »Drene« doma šli,
pa sredi uvinka na glavnu cestu prišli.
Malo prvo nego smo na asfalt stupili,
od straha smo skupa nazad odstupili.
Prvo ča smo zagledali je bil nosorog, mičkin i debel,
a žirafa i zebra su brstile saka soj jasen i dren.
Ni cirkus ni tuda lišo pasal,
aš vozit nespametno je bilo zaman.
Puno nesrić se je još moralo storit, da se je potlje asfalt zgrazbalo
i uvinke kontra nagnilo, pa se veliku škodu ni već storilo.
Danaska su još vavik »oštri« i zviti,
ma z novimi viturami se jih da lahko prevoziti.
Besede: kačka-zmija; Mali vrh, Štulac, Kenulić, Dreni – toponimi; hrbat – leđa, uvinak – zavoj,
auto treno – kamion s prikolicom, »ruski rulet«- potencionalno smrtonosna igra na sreću;
potlje – poslije; žlajfi – kočnice; zgora – iznad, zglajeno – glatko; spusko – klizavo; sfrlit – izletjeti;
»črna točka«- oznaka na cesti u 80-tim godinama 20. st, koja je označavala opasan zavoj;
mulci – dječurlija; sinak – dijete, nazad – unatrag; lišo – bez posljedica, zgrazbati – izgrebati; viture –
automobili.
Pasjak, 08.02.2026