Ni Primorca ki ni proval palentu konpiricu. Bi reć da j’ to najštimaneja palenta, ma kako ki voli… Nekemu j’ morda boja obična palenta z mlekon. Evo ča j’ se od palente i od konpirice, ka se kuha od starine, va svojoj knjige “Va kotliće zmešano” lepo napisala Jelka Žilić:
Svojni se va našoj kuće saki dan, van nedeje, kuhala palenta. Najviše puti za večeru. Frmenta, trukinja, kukuruz, frmentun – ki zna morda je još kako zovu. Prišla je z Merike. Ja ne znan se j’ z konpiron i fažolon skupa pejala na brode, ma stara Evropa je odahnula od gladi. Morete zamislet ča bimo danas kuhali da ni teh trih kumpanjoni. Nisu zajedin judi počeli kuhat palentu, ma malo po malo ognjišća su počela sakuda dišet na palentu. A ona se jila z sakakoven jilon.
Bila je jako štimana, tako da je jeno vreme bila i platežno sredstvo. Čula san da su zidari na cestah i pruge mesto soldi dobivali vrećicu frmente.
Sadila se j’ i va našen kraje, ma je neboga slabo uspjevala, aš su pul nas vavek nekakove suše.
Da vidimo ča j’ to palenta. Najprvo moramo zapisat kakova se va našen kraje kuhala. Najštimaneja je bila konpirica, onputa obična palenta od griza i kaša. Va nekeh drugeh krajeh palentu zovu “pura”, a Goranke znaju i za kolač od palente ki se zove “bazlamača”. Ja ću pisat od one palente ka se kuhala va Kastafšćine.
Za saku vrstu palente mora bit posebna žuta muka. Za konpiricu je najboja muka z malenice. Za palentu od griza i kašu, griz od frmente. Morete kupit i beli griz za belu palentu i par vrsti talijanske muke od ke pride malo škura palenta, ma je jako dobra. Na škatule piše “polenta taragna”, al “polenta come una volta”. Još piše da se kuha trejsetpet minuti.
Z čen se ji palenta? Z kiselen kapuzon, ješmikon, gulašon, z friganun ribun, brodeton, sama z siron, z jaji, z vinon, z mlekon, z lukići, z glodicun, potepjena, pofrigana, polevača, z ocvirki, z slanemi ribami….
Konpirica (najštimaneja palenta)
Kuhali smo je va pinjatice na ognje. Danas već ni pinjatic (stavili su ih va muzej), retki su i šparheti na drva ki imaju kolombar, pa bi se pinjatica stavila va otprti kolombar da se palenta pomalo kuha na ognje. Va Istre san, tamo pred šezdesetak let, videla kako kuhaju palentu va pinjatice na ognjišće. Pinjatica je visela na verugah, al’ je bila na tronošce.
Za konpiricu nan rabi:
- kilo konpira
- muke koliko pita da se zameša palenta
- voda
- sol
Konpir olupimo, operemo i stavimo kuhat va dosta mrzle vode. Posolimo. Kad je konpir raskuhan, dobro ga zmastimo da bude kot jena kaša. Ako je voda pokuhala, dolejmo je. Pomalo stavjamo muku da se ne store grudice i z palentaačom mešajmo. Kad nan se vidi gusto, ne stavjamo više muke. I sad pogledajmo na uru. Dobra konpirica kuha se malo više od pol ure. Mešajmo, obrnjajmo, tomfajmo. Pazite da se ne prismudi aš onda palenta smrdi. Na kraje mora bit trda i kad je zvrnemo na drveni tanjur, mora bit lepa kot torta.
Konpirica se ji z:
- kapuzon
- repun
- gulašon
- polevačun
- sama z siron…
Od posud nabavite črnu padelu, palentač i drveni pijat, se to morete kupit na Beloj nedeje va Kastve.
Palenta od griza
On jako zgusne pa pazite da griz pomalo stavjate va vrelu posoljenu vodu. Ako kuhate trdu palentu, zmešajte malo gušće, a ako kuhate kašu z mlekon al vinon, zamešajte je jako retko.
Pazite, aš fanj šprica.
Za brodet morete skuhat belu palentu, pa je i gušna i lepo zgleda z brodeton na pijate. Za kašu z mlekon zlejemo kašu va pijati al’ zdelice. Mesrede storimo škujicu i lejemo mleko. Ako je za decu, moremo va škujicu stavit i malo cukara.
Za kašu z vinon va škujicu stavimo žlicu cukara i črno vino. Kaša z vinon, al mlekon, se kuha od žutega griza.
Polevača
- konpirica
- gromiški sir al’ parmezan
- ofrigana panceta, kombasice, pršut, zarebrnik
Skuhajmo konpir, zmastimo ga, pa neka va padele bude kot jena dosta retka juha. Dodajmo vode ako rabi. Va nju zasipajmo pest muke, zmešajmo pa neka ta “juha” malo provre. Odlejmo okolo litre te juhe va drugu padelicu i stavimo na kraj šparheta. Skuhajmo konpiricu. Va surice ofrigajmo na maste suhega mesa.
Kad je konpirica kuhana stresimo je na pijat, stavimo sakemu na pijat kus palente, polejmo je z onun “juhun” i stavimo na pijat dosta ofriganega mesa.
Naribajmo fanj sira. Uz to jilo gre črno al’ belo vino, mlado al’ staro. Kakovo imate, al’ kakovo volite. Jilo je moćno i ni baš za oneh z tlakon i bolnen srcen. Ji se najveć va kasnu jesen, opozime al’ na mlado leto.
Rekli su mi da su polevaču rado kuhali paleri kad su va Lužine palili krbun. Oni su va Lužinu sobun nosili pinjaticu, vrećicu žute muke, sol, ploh špeha, vrećicu konpira i barilicu vina.
Va Kastafšćine su svojni bila tri vela dela ka se nisu mogla delat prez vina. Bili su to kopnja, košnja i palerija.