Piše: Josip Orlando Hrvatin
Ovo je članak od bogatije narešćine, spravne, aš već ne rabi. Ovde su slike orudja narednega za kopat zemlju, za kamik i okoli drv i još malo slik od narešćine.
Na sliku je železni grafon zas zubi na obe strani za obdelat kamik, skopan z njive (fali mu držalica). Grafon z još 70-ak predmeti je donacija J.O.Hrvatina u fundus Muzeja u Lipu.
Potlje su slike orudja za obdelavu kamika i za batudat-bati i batići, kramp, matika, špica i železne vile.
Za delo u zemlju su matičice i matike, a za obdelavu drva su bile sikire, pile, capon i plankača (tesla, bradva) za tesat deblo pa storit grede. Na sliku su i dvi železne štike.
Za nosit zemlju, fašiće, ali kaminje su bile čivere, a za vozit ni karijola ni čivere nego kombinacija, a to je čivaron.
Ovde pripade i slika z Jušići ud ljudi ki kopaju zemlju med trsi, na njivu. Udzada se vidi Stari grad kakov je nikada bil. Slikano je okoli 1955. leta.
Sablja, francuski bajonet Sv.Stjepana, natpis St.Etienne 1880. je poli nas ustal od Napoleonove vojske. Ljudon je bil naredan za klat prasce.
Račun z dne 20-1-1912. leta je za slamoreznicu isporučenu po železnici z Ljubljane na štacjon Šapljane za u Pasjak. Lipo se vidi i timbar prodavača na dno računa z jenoletnu garanciju. Za račun se zahvalin Šapljanki Lauri Surina, a za CB sliku pile Konzervatorskemu zavodu, Rijeka.
