Piše: Josip Orlando Hrvatin
Šterne su si počeli delat ki su bili prmožni (imućni) ali ki su se vrnili z Merike pa su delali šterne, a i hiše.
Kako i drugi, tako je i Mate Iskra Brgujčov, dva pute bil u Meriku, pa kada se je vrnjal, je z dolari dal delat šternu doma (1904.) a kada je prišal drugi put je je delal soji sestri Jelici oženjeni poli Kućankinih (1912.leta). To je zapisal u pismo ko je počuvala naša mama. I nono autora Ive Bratović je bil dva pute ća, prvi put u Argentinu kamo je šal zas hćerju Tonku, a drugi put u Meriku. I njegovi dolari su pomogli, ma puno je potrošil i za se vrnit doma.
Doli napišeni hišni broji su stari, aš su većinu štern delali okoli malo potlje 1900.leta pa su vredili stari broji. U zagradu su leta na šterne.
Šterne u Pasjak: Najstarija je Prelićova kbr. 48 (1898), Dolinkina 32 (hiša je storena 1841. a šterna 1902.leta), Kundina goranja, prvo Šepčova 9 (1903.), Škrljova goranja 46 (bb, nutarnja šterna, uklonjena), Srdetova 3 (1904.), Brgujčova 28 (1904), Vrtoličina 7 (1905. na pokrov), Jakočinova 29 (1906), Šaletova 38 (hiša je delana 1888, a šterna 1906. inicijali AH). Grlo je z kave Kras Sežana delano ud korša, Krvarova 14 (1906.), Jerićova goranja 52 (1907.), Gašparova 11 (1908.), Barburina 5 (1912.), Kućankina 53 (1912), Lukinova 39 (1924), Kunsljova 67 (1934. i druga pod tarac 1938.), Peretova 8 (bb), Andrijova dolanja 41 (bb), Škola 63 (bb), Šorićova šterna nima leta, Stipenova 17 (—), Kundina dolanja 16 (bb), Šimenova 31 (starija pred hišu bb i druga u vrt delana 1944.leta). Gržanovi dolanji su storili šternu poli štale u vrt u Podurihe 1991.leta. Škaljanova hiša kbr.21 je šternu jimila pod hišu, a sada vode ni. Grlo ni jimila.
Jerićova šterna (Iskra) jima zapreminu šezdeset kubiki. Kvadrata je i dimboka četire metre. Dno je jajasto, zaukrugljeno. Delal je je, kako i hišu, zidar Valentin. Velika je koliko i tarac pred šternu. Ubrajhal je je zidar Željko Iskra roj.1953.
Po strani šterne i dno su delali z kamenimi škriljami ke su zamašìli (spajali) z jilon, a pod vrh su veljbali. Veljb se reče poli nas, a drugderi se reče volta.
Za sliku Prelićove šterne hvala Brašotu Pavičiću, a Šimenove Lorici Šustar.
Na sliku je i Paška šterna, pod samu štriku na šapljansku stran. Kada je bila suša su po vodu prihajali z bačvami z vozon z Pasjaka. Ta šterna je delana za železnicu okoli 1873.leta i voda je čaz cijevi tekla gravitacijski z fontane ne dugo ud tunela. Šterna zdola Vage z lipimi debelimi zidi ud sklesanega kamika je, radi širenja štrike, predviđena za rušenje, kako i vodotoranj do same zgrade kolodvora Šapjane. U prilogu su slike. Ta šterna i vodotoranj su spomenička baština tehničke kulture. Ki će rušit ga to ni briga!
Zdola Paške šterne, bliže šapljanskin hišan, je Šapljanska šterna. Kameno krunište cisterne Šapjane 1, je kot kulturno dobro Registra kulturnih dobara Republike Hrvatske zapišeno pod br. Z-2669. Općinski plan predvidil je rekonstrukciju te šterne„al’ se nisu maknuli dalje od početka“ kako piše u „Pačju školu“ (pitat Mjesni odbor i općinu).
Na slike su i šterna u selo Cari, sada u šumi i druga Pul križa na križanju puti Kastav-Obadi-Spinčići. Ud 1920.leta je rabila graničaron Stare Jugoslavije aš su tamo bile drvene barake i stražari, graničari. Šterna jima i odljev z koriton, betonski tarac na kemu piše u beton Lovorka; i sada odmorište z klupami. Par metri je poli samega puta raspelo z križon a na stupiću piše Uspomena za mir 1918. i Mir juden dobre voji 1991. pa kada je bilo dobre volje bin rada da se još stori ti pakrov na šternu.
U selu Jurdanići je šterna na ku je uklesano: ova sterna je storena v letu 1809. a gerlo v letu 1848. kada je vela sussa i vela vojska bila. Bilo je to revolucionarno 1848.leto. Leto 1809. nismo baš sigurni, aš je nedostupno za točno prečitat. Za ta leta i za Prvi svjetski rat su govorili Velika vojska. Ovi natpis je, tako, neprocjenjiv dokument vrimena.