Finil je ČANsonfest, lepo j’ bilo domaće pjesme naslišat, a va Škabeline morete poslušat neke najboje ča su se čule na Crekvine.
Da se i z praznun glavun more dobit nagrada, špjegala nan je Rajka Jurdana-Šepić, aš je istoimena njija pjesma S praznun glavun, ku j’ kantala Katja Budimčić, na ČAnsonfeste 2024. dobila nagradu za najboji tekst. Nagradu za najboju skladbu prijel je kantautor Robert Funčić za svoju skladbu Mazinac ka je spjevana na klanjskoj čakavštine.
Katja Budimčić j’ najboja interpretatorica, al bi reć kanturica, a nagradu publiki i naslov najbojega kantautora dobil je Dražen Turina Šajeta za pjesmu Najboji čovek na svete.
A nagrad je bilo još: Radio Istra je nagradil najizvođeniju skladbu 19. ČAnsonfesta – Kastav 2023., Ni nan moglo bit ku kantaju Karla Pupis i Mauro Staraj. Pomorski radio Bakar nagradu za najboju zavičajnu šansonu dal je skladbe Deca z Govca ku su kantali Silvana i Duško Jeličić, a stihi napisan Nenad Smajila na govoru mesta Brdce pul Pasjaka.