Piše: Nenad Smajila
U čast 100 letnice KUD Danica, 7.9. će bit u Pasjaku “Na Domu” izvajan program za proslavu tega velikega jubileja. U jesen 1924. je osnovano “Izobraževalno društvo Danica – Pasjak”. Unuč je domaći govorni jezik bil slovenski i hrvatski, a uradni (službeni ) talijanski. Osnivač društva je bil učitelj Slavoj Makarovič po rodu z Jelšan (na slovenski strani) u vrimenu fašizma, ki je proval u korenu zatrt domači jezik, muziku, kulturu i se ča ni bilo po volji talijanski oblasti.
KUD »Dȃnica« za 100 lȅt
U svȉt zȍre, kȁda sûnce se pr’prȃvlja stȁt,
jȕšto unipût se Dȃnica na obzôrju, sprȃvlja spȁt.
Cȇlu nȍć nãn mȍćno svȉti i zvȇzdican kȃže pȕt,
da se u jûtro, na svȉtlen nȅbu ôpet nȃjdeju sȅ skȕp.
Dȃnica ni sȃmo nebȅška, u Pȁsjak to sȃki znȃ,
unȋ kȋ je tôte rôjen, je prȋšal, ȃli je sȃmo zgojȅn.
100 lȅt nãn vȅć kȃže pȕt, kȋ nȃši stȃri su gã storȉli,
kȇga smô do sȃda, sȉ skȕp slȍžno prehodȉli.
Dȃnica nȃs tȃko vȁdi, dȃ se nȉkada ne pozȃbi,
čȁ su nȃši drȃgi stȃri u »čȓne dȃne« obećȃli.
Dȁ ćȇju čȕvat sõj jezȉk, kȍt se čȕva ôko u glȃvi,
i dȁ nȇćeju pustȉt, pred nȋkin gȃ pohlȇnit.
KUD »Dȃnca« su zȃto storȉli jȍš lȅta 1924 (hȋljadu devȇtsto dvȃjset i četȉri).
Danȁska je jȍš vȁvik tôte i vȅkomaj nikȃ bȕ!
Dȃnica, bȕdi žȋva, zdrȁva, prkôsna,
i na sȅ sõje člȃne, vȁvik ponôsna!
Srȉća nikȃ tȋ durȁ nȃjmanj jȍš naslȇdnjih 100!
Besede: stȁt-ustati; jȕšto unipût-točno tada; sprȃvlja spȁt-priprema na spavanje; tôte-tu;
vȁdi-uči; pozȃbi-zaboravi; »čȓni dȃni«-dani fašizma; pohlȇnit-posrnuti; durȁ-traje.