Piše: Nikolina Morićeva
Moja mat je užala reć – čuvajte, deca, recept aš to j’ tajna od dobre kuharice. Imeli smo svoji recepti, ma jih nismo naširoko povedali. Jušto ako se kemu našemu jako zapijaža, bimo mu ga zapisali. Tako smo si mi va našoj užoj familije znali za kocke od sira od tete Duše. To j’ bil kolač ki se jil za rojendani, ma i za saku drugu prigodu ka j’ iskala malo boje lego sakidajno. Lahko se dela, a još jagje poji. Dobar je i pozime, ma po lete kad nan se ne rače teški kolači i torte od čokolade i orehi, ovo j’ dušu dalo za osladit se.
Ni čuda judi dobilo ovaj naš recept, a još smo ga kroz leta si pomalo dodelali, pa j’ danas još boji lego j’ bil. Moderneji, bi reć.
Ni čuda judi prepisalo tisti recept. Leta pasuju, gjedan va njega, pa mislin – ča će nan va ten kratken živjenje naše kuharske tajne? Ma neka judi kuhaju i va finoj hrane uživaju. Pa evo, ovo j’ recept za kocke od sira ke su z leti postale torta, i to kakova!
Kocke od sira (od tete Duše)
Testo:
5 veleh žlic cukara
5 žlic muki
3 jaja
vela žlica uja
prašak za pecivo
Fila:
25 dek friškega sira
2 slatka vrhnja va čašice (al 500 ml va pakete)
5 veleh žlic cukara
Žutnjaki stuć z cukaron va miksere. Dodat uje. Va to stavit zmešanu muku i prašak za pecivo, a kad se se zmeša, pomalo žlicun zmešat va to sneg, ki ste posebe zmiksali. Speć va okruglen plehe ako ćete tortu, al va velen ako bite raja kocki rezali, i to na 200 stupnji Celzija, manje od 10 minuti – dok ne požuteje.
Za filu najprvo stuć šlag z mikseron, dodat cukar i sir i se to još malo zmešat. Kad je biskvit ohlajen, prerezat po sredine, malo z mlekon pokapat i punit z filun. Ako će bit torta, more se malo file pustit pa z njun na kraje premazat okole celu tortu. Ako ste pekli va velen plehe, prerezat biskvit napol, na jenu stranu namazat filu, poklopit, i zgora posut štaubon.