Vlasta Šepić
Počet hodit na tanac to da j` početak fraja
su naši stari govorili i nisu va krivu bili.
Saki mladić je svoju na tance špegal
namigeval i milo ju gledal
a ako je z drugen tancala i barufu je delal.
Tepla ruka okol pasa k njemu se j` stiskala
a vrela usta mu obraz iskala.
Bušić ukraden, po tebe srhi, glava kot balun napuhana,
a nogi ti moluju kot pašta kuhana.
Ma kad armunika vrisne srce ti se stisne, pojka te ponese
nogi ti se tla ne tiču i same poskakevat išću.
Jedan miran tango va romantiku te vrne
dok te živi rock n`roll hitro ne obrne.
Potan i mokar na klupu sedeš al vanka,
va mrak, z mladićon pobegneš.
A materi i noni na galerije al po strane
su nastale i nisu se doma spat dale.
„Ma sken to naša smiron tanca, čigov je ti mladić,
je s ke šesne familije al kakov brižan fićfirić.“
„Ma ča to vašoj maloj va glavu pride,
ča ti brhan zdolun ne potegne, nogi njoj se i do riti vide.“
Ma koliko one jako gledale i na mladeh pazile
našle su način za vanka pobeć, bušić dobit,
stisnut se i ku lepu besedu reć.
Se to do novega plesa valcera, tanga al pojki
aš kamo ćeš lepše zabavi za mladići al divojki.