Piše: Sonja Vlah
Va matujsken Amfiteatre na devet večer pogasila su se svetla reflektori i ovo leto, dvajset i četrtega agusta 2024. počel je ples Udruge umirovljenika Općine Matulji.
Z pleson su finile Matuljske ljetne večeri “Tramontana će vas ofriškat”. Počele su z mlademi, a finile z starejemi.
Publika je uživala va plesneh korakeh penzići i to u tri bloki, a med plesi su nas zabavili Nevia Rigutto i Francesco Squarcia. Ma kako. Kadagod pjevaju, ti se čini da je to bilo najboje do sada. I je, vavek.
Nevia je otpjevala pjesmu Aveline Damijanjević Draguzet „Za dešpet“ i „Piši mi ud Brusna“, a Francesco „Canzone alla mia terra” z Mik-a 2017. (kade je dobil nagradu žirija) i pjesmu “Ča te judi reć” Alfreda Šaine (aranžman F.Squarcia), a skupa su otpjevali “Kamo j` šlo” i “Tri nonice”, va aranžmane Aleksandra Valenčića.
Dočekali smo i violu pa je virtuoz Francesco odsviral “Serenadu” Franza Schuberta i “Mađarski ples br.5” Johannesa Brahmsa (prerada za solo violu Francesco Squarcia).
Ljubiteljon je bilo puno srce, a naši Fiumani su i najviše pljeskali, ma su i drugi, smiron. Lepo je bilo čut teple besede Francesca za najavu pjesme “Canzone alla mia terra” o temu kakov smo mi multikulturni kraj, odvavek.
Pokle penzići plesala je napredna plesna grupa “Valterovih 11” Valtera Hrabara pa su zaplesal i plesni voditelj Duško Đurđulov i družica.
I na kraje su Penzići otplesali „Line dance Travolta“ , naklonili se i dobili velik pljesak zadovoljneh va publike.
Bil je to kraj Ljetneh večeri ma ne dela penzići. Već va deveten mesece pripravjamo skupštinu, pa od 25. 9. izložbu keramike va Galerijice (durat će celu šetemanu), a 27. 9. Europski dan jezika, pa kuharske radionice i boćanje i kartanje va Hangare. Si člani su željni druženja i zato štimaju se ča dalamo, aš ki voli delat, vole ga i judi.
