Ovisti recept napisala j’ Jelka Žilić va knjige “Va kotliće zmešano”, a sad mu je jušto štajon, aš angurije su pred kraj, čuda ih je prezrelo, pa j’ najboje storit od njih marmeladu.
Angurija ne raste pul nas, al’ je na place cena, a marmelada kot med. Malo je štufna za kuhat, al’ provajte.
Anguriju očistimo od paškvic i narežimo na kuščići. Sameljimo na “multipraktike” i na kilo soka stavimo kilo cukara. Drugi dan kuhajmo kot saku marmeladu. Bit će van čudno, aš je jako retko. Neka pomalo vre na mićen ognje, povremeno promešajte. Ne prestrašite se! Kuha se okolo dve i pol ure. Kad zagusti i kad je finjeno, stavite nutra kanelu, garofulići na vrh noža, cimeta i rum. Videt ćete, odlično je – vredilo j’ truda.