Autor: J.O. Hrvatin
Reču da su čakavci ki znaju razliku med č i ć. Nu, ki moru točno prečitat i zreć – su.
Ča je uno črno tamo ća? Je ublak?
-Ma ni.
Da ni coprnica z metlu ali Mrak?
-Ne, ni.
Ma šćetine jima, da ni kudlak?
-Ni, ne.
Da ni praščìna dívji?
-Ma ni.
Je máčkina črna?
-Ni, ač leti.
Znan ča je – klìšćarina črn ki leti.
-Neeee, ni.
Je hudìć črn rogat, ko leti?
-Neeee, ni.
Eee, ćebar je, píšće, ali ćuh vetra, ča ne?
-Ne pa ne.
Kako ni kada je?
-Kako je kada ni?
Sada sviti i blišćì, da ni strela božja, kakov kaštig?
-Ni.
Morda je prašće?
-Morda je, morda ni.
Nu, je, ali ni?
-Nu, ni.
Je ćepa črnega sniga s Ćićarije, una s piskon z Arabije?
-To ni.
Po hudića ćorovega, je ublak črnih čvrčki?
-Ne.
Nika črna črčkaríja na nebo je, ča ne?
-Je, ma ka?
Su črnomorke?
-To pa ne.
Ćo, gren ća.
-Ćeš ni ne.
Sunce zasije, se rasćarí, muk jenemu ni drugemu već ni.