U noći z 29. na 30. 5.1983. su va Pasjaku tragično izgubili jenega jako nadarenega i popularnega Paščana, mladića, ki je znal razveselit celo selo. Bil je odličan sportaš i svestran svirač, član NK Pasjak i KUD Danica-Pasjak.
Za spomin nanj je Nenad Smajila napisal ove stihe:
Jȉme mȕ je bȋlo Fêrdo, mȁ zrȅkli smô mȕ Sȃja.
Bîl je lîp, šlȁnk i čȓn, kȍdabi sȃje i krbûn.
Unȋ, kȋ je u Pȃsjak drȕgo jȉme dobȋl,
do zȁdnjega dnê ga je zas sôbu nosȉl.
Dȁ je znȃl jigrȁt bȃlu nȋ bȋlo čûdno,
mȁ na štrȕmente svȋrat je bȋl prȃvo čûdo.
Čagȍd je u rȕke prijêl, na tô je zasvȋrat znȃl,
takôv dȃr je jimȋl, da je i ud mêtle štrȕment stôril.
Ud ramȍnike se ni udmaknȉl, dȍklje je ni rastêgnil,
u ȃuto se je ž njȋn vôzila, kȍdabi mû sêstra bȋla.
U KÛD »Dȃnica« je užȃl prijêt za tȃmburicu,
pȑvi ali drûgi brȁč, bȃjs ali bȉsernicu.
Kȁda se je za pûst po sêlu hodȉlo vragȁt,
u sȁki brijȃč je znȃl i jênu zakantȁt.
Kȍdabi gospûd, kȋ prȋde žȅgnat hȉšu, sȁkemu je rȕku podȁl.
Vȁvik je udzȃda hodȉl z Bôjanon, Êćeton i jȍš zȃs kȋn.
U famȋliju je bȋl jêdinac, u NK Pȃsjak pȑvotimac.
Za sõj klûb je žȋvil i njêmu se prilagodȋl,
kôt profesionȃlac od kêga je krȕh dobȋl.
Ȃ sȅ je dȅlal za drûštvo i dȍbru vȍlju!
Vesȅlja se nȋ nȉkada udrêkal i za bȃlu je vȁvik rȃda tȅkal.
Pôtlje je u Slôveniju šȃl i za NK Plȃma-Podgrȃd zajigrȁl.
Bȋlo je lȋpo i fãnjsko, aš je tûdi drȕge ljûde spoznȁl,
ž njȉmi VIS »Solzȉce« stôril i sȅ nȃs tȃko razveselȉl.
Mȁ pô lȋpem vȁvik prȋde gȑdo, takô je i njêmu.
Kȁda je zȃs Plȃmu šȃl pȍbjedu proslȃvit,
zȃs ramȍniku je za krȃj Pôsmrtni mȃrš zasvȋral.
Tô je bȋlo tûdi zȁdnje čȁ je zavȃvik odsvȋral.
Fêrdota nȋsmo vêć jȉmȋli, pȃ se je u Pȃsjak i klûb zamorȉl,
»Dȃnica« je bȋla jȍš mȁlo živa, mȁ nȉkada se ni vêć tako veselȉla.
Hvȃla mȕ za srȉćne dȃne, kȋ smô jȋh ž njȋn jimȋli,
nȉkada nêćemo pozȃbit spomȉne, kê smô skȕp storȉli.
Fêrdo, hvȃla!
Besede: saje-čađa, brijač-dvorište, zakantat-zapjevati; žegnat-blagoslovit