Ova pjesma od jubavi j’ pisana na vrbničkoj čakavštine. Autorica – Marija Trinajstić Božić.
Kada sence o zahoji zaspi
a nebo se zaškuri i ze zvezdami osuje,
kada misec nad nami svoju želtinu prosuje,
morda ćeš prit ….morda jedenput.
Kada se jedno jutro zbudi more
i va postiji od vali zatanca prije zore
dokla se još kupali budu kalebi i zvezdi,
morda ćeš prit ….morda jedenput.
Kada zagrebel budeš va morski mel
i kaškuju spod kamika stišnjenu našel
va njoj jeden kjučić je sranjen,
zemi ga .. to kjučić je od serca moga za te spraven.
Ondat, morda budeš ustal
…..morda jedenput.
Kada mi gjedajuć v oči do duše prideš
prije nego opeta nazada ideš
če nigdar do sedaj nisi, zreci
i ako imaš serca i kuraja, šćeto reci.
Ondat, morda budeš zavavik ustal
….morda jedenput.
Marija Trinajstić Božić