Kako i saki petak i ovega petka 5. aprila 2024. smo va kuhinje va Hangare
skuhali za naši penzići, člani udrugi, sada neč z knjige Matujska kuharica.
Branko z Rukavca nan je nabral kup vršići mlade koprivi pa smo skuhali paštu z
koprivami. To nan se je videlo najzdraveja hrana za ovi mladoletni dani.
Prvo smo kuhali za va knjigu, a sada po knjige. Receta je va priloge pa nećemo
prepiševat.
Nismo misleli da će bit ovoliko zanimanje za naše kuhanje, a ni za knjigu, ma je.
Ljudi su prihajali i prihajali, neki i po pet knjig, aš da je to za njihi prijateli
najboji dar.
Bi reć da smo storili lepo delo. Za one ki pitaju moremo reć da je zanimanje
velo pa ko si ki ni prekural knjigu, more i daje prit va Udrugu po nju.
Napisala Sonja Vlah