Štorija “Tri strahi” Berta Lučića, najvećega kastafskega komediografa, je anegdota od jenega delavca ki je delal va kamenolome, a teško delo “prebijal” je škercon.
Živel je pul nas čovek ki od živjenske sreći ni na ten svete niš imel. Bil je mladićac kad je počel Prvi svetski rat, ki ga ni povukal na front, al je oćutil so zlo ko je š njin i va njigovu kuću prišlo, a utinut glad. Ča se tega glada tiče, judi povedaju da je 1917. leto bilo najhujo, ne samo zato ca se ni niš nigde moglo kupit za pojist, lago da je na so to zlo bila udrila takova suša, da ni, od kad je kompir bil posajen, dokle se ga je šlo kopat, pal ni kap dažja. Kakov je ti brižan kompir bil, lahko se more pretpostavit. Junak ove naše štorije je bil va najbojeh leteh kad mu je hrana bila najpotrebneja, a ni bilo ča v’usta stavit. Povedal je kako j’ užal kakovu padelicu let malo octa, pak da je šal pred vrati na lehu kade je onako napol uvelu i su zgorenu salatu otkidal, va ocat močil i jil. Ni je rabilo prat!
Ni kad je na leta prišal ni imel sreći va živjenjen, ni z ocen, ni z sinon, a ni sam sobun. Grda bol je bila celega njihovega živjenja va njihoj kuće stalni “fitoval”. I va sen ten zle je imel vavek volju za škerc, kako na tuji, tako i na svoj račun. Našal san ga tako jedanput, vaje za Drugen svjetskon raton, pul mojeh doma na mojoj starine. On i moj pok. otac su neč od politiki kuntreštali. Kritizirali su se živo. Ja pak, onako friško neč malo agitpropovski cepjen, dal san njin, kako se ono reče, jenu malu kontru, kad mi naš “junak” ove štorijice govori:
– Ti muči, dosta ste pasanega rata lagali, ne rabi da lažeš i danas. A ča samo to lagali san ga onako malo začuđeno pital? A na puna usta ste zmamili kako za raton neće već bit gospodi, a ja vidin da su sada dupla. Kako pak dupla, pitan ga ja? A tako odgovara mi očev prijatel. Oni od prvo su ustali i vi sada novi.
Potla je fanj let delal va neken kamenolome kako kavador (kamenolomac). Poznal je kamik va dušu i bil je odličan delavac, si su ga štimali. Delo je bilo teško, a ni hrana ni bila ki zna ča, ma ga sejeno “žica” za škerc ni nikad napustila, pak je nejde povedal klesaron s kemi je delal, kako on ima tri strahi va kuće.
Kako tri, pitali su ga pajdaši? A tako lepo. Iman staricu mater, stara je preko 80 let i boji se da će umret, to je jedan strah, onda iman ženu vavek njoj je neki vrag, smiron se okol duhtori mota, i nju je strah da će umret to je drugi strah, a mene je pak strah da neće jena ni druga…
Umrli su već si, ostal je još samo sin ki ni, ča se zdravja tiče, niš boje sreći lego ča su mu preci bili, pak se čovek s pravon pita da kamo bi zlo udrilo, kad siromaha ne bi bilo.