Konpir i fažol se va našen kraje ji otkad je judi i veka. Kombasice su se nutra rinule kašneje, aš ni bilo mesa ni prašćevine za saki dan, leh morda po nedeje. Siromaško jilo, ma i dan-danaska ga volimo pojist, ne samo doma, lego i va planinarsken dome i va oštarije.
Ovo j’ recept od Jelki Žilić, z njije knjigi “Va kotliće zmešano”:
- Pol kila konpira
- fažol
- suho meso
- smok
- vegeta
Fažol očistimo, operemo i stavimo kuhat z suhen meson. Konpir olupimo, operemo, narežemo na komadići i stavimo kuhat. Kad je fažol kuhan, zmešajmo ga z konpiron, dodajmo žlicu domaće vegete*, zasmočimo i kuhajmo. Gospodin fažol je va našoj kuhinje zel počasno mjesto, skoro pa mu ga ni konpir ni prezel.
*Domaća vegeta: Zamite pol kila petrsina, pol kila šegjina, korabice za juhu, paštrnaka, paprike, kumadori, merlina. Povrće oprat, olupit i zimlet. Na pet kil zelenjavi gre pol kila paške greze soli. Se se dobro zmeša i stavi va važići. Ne rabi konzervansa. Čuva se i po leto dan. Namesto kupovne, porabite domaću vegetu. Sol je čuva, pa jilo ne rabi puno solit.