Za prvu pričest se je poli nas reklo obhajilo ali uphajilo, a za drugu berma.
Za fundus muzeja u Lipu smo 2016. leta sestra i ja darovali se skup po popisu 86 predmeti.
Ovo je manji del: šuštarsko železno kopito, veću i manju latu za mliko, ublići, trapani, trapulu za puhe, železne ključe i drven ključ za seno, kamoštre, kantridu Thonet, železni trinogi, bakreni kotlić za palentu, železan grafon – na obe strani zubi za obdelivat kamik.
Posebna su mi vridnost bile počuvane bermana boršica, dvi krune z rožicami, buket i rukavice Enice Hrvatin, sve belo – vidi sliku. Spomin je to na našu mamu ka je se to čuvala. Spametin se da je ta bermana oprava bila u jenu škatulu na ku je pisalo Istra, Zemun.
Tu je i slika sestre Enice roj.1947. ku smo drage volje dali za dar Muzeju u Lipu. Na dan berme je rabilo prit u Jelšane (avgust 1959.) i daš je jako padal pa su niki naručili taksi z Matulj. Ja, za posebnu priliku se je i potrošilo.
Još vridnih stvari smo posudili Rodoslovnemu muzeju Kastavštine i Liburnije, a nike darovali.
Na veću sliku su dica pred crikvu u Jelšane i na sredi gospud Božidar Božič. Ko smo se ča navadili ali dobro nacrtali, smo ud njega u teku dobili timbar-„zlatu“ čebelicu.
Napisal: J.O.Hrvatin