Napisala: predsjednica Udrugi, Sonja Vlah
Osmi mesec je za počitak i more, ki će i more. Vreme je i za par besed o temu ča smo do sada delali i za neki naši plani za napred. Ovo je samo manji, ma nan važan del.
Kuhinja za ljude starije dobi
Prostor za druženje penzioneri bil je va Društvenen dome va Rukavce leto dan. Zaposlili smo 11-10-2021 kuharicu. Dela četire ure. Radi velega broja neupisane dece va vrtić, je ta prostor prenamenjen va dečji vrtić.
Tako je općina prostor za naši penzioneri namenila va Hangar, pa, kako va Rukavce, uredila kuhinju.
Se radionice ke delamo su financirane iz europskeh fondi z projekta “Aktivni umirovljenici-dugovječni stanovnici”.
Va kuhinje, kot Kuharske radionice, kuhamo saki petak drugu jidaču. Dok se u petak kuha pride po trejset penzioneri, korisnici Hangara, pa igraju društvene igri-karti, a mi ih poslužimo z ten ča smo storile.
Do sada je bilo okole četrdeset jidač, pa se vidi koliko petki smo dežurale. Uz hranu pride i ča slatko ča prnesu od domi. Većina jidač su stari recepti, jidače naših starih.
Saku sredu imamo društvene igre pa neki opet igraju karti, a neki boćaju na joge.
Saku šetemanu imamo dvaput tanci – Plesne radionice po petnajst pari pa ćemo publike pokazat 27.8. 2023. ča smo se navadili.
Vježbe za tretu životnu dob su pondejak, torak, sredu i četrtak va Hangare, a po petkeh va Brgude i Zvonećoj. Vodi ih fizioterapeut. Ovo se isto financira z europskeh fondi.
Od Kreativneh radionic smo va Galerijice pul Matuj imeli izložbu našeh radi – oslikane borše i lumbrele i izložbu keramičkeh predmeti ke smo delali pul Mučić.
Va deveten mesece ćemo imet proslavu Europskega dana jeziki, 23-9-2023.
Adresa Udrugi: Matulji, Dalmatinskih brigada 5, tel. 709-174