Paščan Nenad Smajila pošija nan pjesmicu ud gore, ki je razdelila sela Pasjak i Šapljane na jeni strani, ter Mune i Žejane na drugoj. Va Škabeline ju objavljujemo va spomen na “mednarodni dan šume”, ki će bit 21.3.2024.
Nenad Smajila je rojeni Brijac, rojen 1965., a već 34 leta biva priko meje u Podgradu. Po struke je inžinjer strojarstva, diplomirani baštinar i magistar arheologije. Zadnja leta se bavi, po pašćansku, z raziskavami sojega kraja po baštinarski i arheološki plati. Kada jima ča cajta napiše tudi kakovu pjesmicu (prozu) ma se na osnovi jistinskih dogodkih.
Gôra
Pasjȁk, Šapljâne, Mûne i Žêjane,
to su naša sȇla, ki pod gôru su se usȇla.
Gôra jîh je razdȇlila, ma ljûde je skȕpa dîla.
U vâ nju su se potȉli, a lôvci su je prehodȉli.
Intãnto je tȕ i tȁmo bîvalo jenâko.
Trîbalo je dȅlat i se veselȉt,
kȁda je prîšla ȕra, čȁ dȍbrega popȉt,
dâ se rôd ne zatâre, pa tȗdi oženȉt.
Mûnjci, Žêjanci, Pãščani, Šapljȁnci,
skȕp su kantâli i Pod nôgu zaplȅsali.
Nȉč nî bilo tȇško, sȅ se je dalo storȉt,
kȍ je bilo strâšno i sȇla obnȍvit.
Dȗgo je bilo takôvo, danȁska je drȕgo vrîme.
Nȉdan vȇć ne grȇ u gôru jiskȁt sõje brȉme.
Gôra još vȁvik stojî, ma vȇć ne abadȁmo,
ôpet smô sȉ skȕp, ma se ne poznȁmo.
Na mularȉju se ni ča zanâšat, oni jimȁju drugãčnje înterese,
gôra jîh ne zanîma, aš nĩma e-mail atrȇse.
Tȗdi têmu će prît krâj, aš sȇmu vȁvik prîde,
gôra sãmo čȇka na nikô drugo vrîme.
Autor: Nenad Smajila, mag. arheol.