Kako i ono velo kolo kada se zavrti se tako lahko ne ferma, tako i mi vavek
mislimo ča je storit. Da se za nas zna ma najviše da se počuvaju naše stare
nepozabljene navadi.
I ov put smo se nadelali, ma bil nan je gušt pa smo delajuć uživali.
Ovo je treto leto da smo krunili Vazmeno jaje. Općina nan je nabavila
konstrukciju, a mi smo je krunili. Prvo leto smo z uličnemi kiticami, drugo z
bršjanon i delali rožice od harti, močili va vosak i stavjali va bršjan.
Ovo leto smo, kako i prvo, nabavili maćuhice, a složili va kitice od javorike.
Slika najboje pokaže kakovo lepo delo smo storili. Bilo nas je i više ma neki je
moral slikat, neki donest kafe.
Šetemanu pokle ćemo pokazat i ocjenjivat spečene Vazmene pogače. Bit će i
picanje jaj i dečice ka će iskat po parke kade su skrivena jaja.
To će bit petak, 22-3-2024. od devete uri i pol.
Ako bu grdo vreme ćemo poć va sportsku dvoranu.
Napisala: Sonja Vlah, 15-3-2024. leta