Vredna Matujka Sonja Vlah nan je poslala malo od navad i tradicije ke se pul Matuj trdo drže.
Piše: Sonja Vlah
Za Dan narcisi članice Kluba Novi život i volonterke matujskega Aktiva Opatijskega Crvenega križa su delile poučne materijale i ćuki (narcisi), simbol jačanja svijesti za prevenciju i rano otkrivanje raka dojke. Ki su ča priložili va škrabicu su dobro storili.
Petak 22. marča 2024. matujski penzići su raneje jutro skrili vazmena jaja okole amfiteatra,
pripravili picanje jaj i ocjenu najbojeh vazmeneh pogač. Na krove Sportske dvorani je bilo
stavno na stol trinajst slatkeh pogač, a va kantune pod zidon su picali jaja.
Ferdo Staraj i Joso Anić su dobro hitili i euro njin se je zabil va jaje. Ferdotov euro se je zabil
va jaje do kraja. Dokle su oni hitali je već dugoletna komisija oštrega oka i dobrega pokùsa,
Bruna Šeškar, Zora Boroša i Vesna Perožić, ocenila ki su storili najboje i najukusneje pogači.
To su prva Vojka Radetić, druga Estera Marmilić, a treća Marinka Gržinić.
Od pekar ke su poslale slatke pogači na prven meste je matujski Mlinar, na drugen Radnik,
Opatija, a na trećen Birota.
Najmanja dečica z vrtića su se držala za jenu dugu traku i tako iskala skrivena jaja. Škoda da
ih ni imel ki dopejat na krov Dvorani kade je bila publika da njin zaplješćemo. Poslali smo
njin punu zdelicu čokoladneh jaj.
Za dobro raspoloženje ćemo pohvalit naše prijatele, voditeljicu Ninu Dukić Srok i svirača
Željkota Valenčića. Bilo je kratko, ne predugo, ali jako veselo i slatko.