Pust je. Finila j’ i ova. Zato je lepo da se spametimo na nekadajne užanci, a o njih je lepo povedal Ivo Jardas va knjige “Kastavština”:
Utorak pred Popelnicun zovu Pust. Deju i Mesopust zato, aš se od pol noći na Pust mora meso i saki mrs pustit po bande. Ni zabel ne delaju z mastun ni špehon, lego z ulen ale z maslon.
Na Pust nijeden niš ne dela, lego stari judi pred vrati žukvu čiste ale kolci bele. Na Pust rano jutro pul Marčeji bila j’ užanca ječnik poset i mej njega merlin. Ki merlin seje, trebe je, da se do naga suče i da kriči: “Dug debel, dug debel”. To mora bit posejeno, utinut ako j’ dobra luna prej sunca zilaza.
Pokojni Matok da j’ na jedan Pust rano jutra va Kapužnjake merlin sel. Nag je bil i zmamil je: “Dug debel”, vas Kapužnjak je ozvanjal. Neke Gromišćice, ke nisu znale za tu užancu, da su pasevale skroz Kapužnjak po staze ka pride od Benaši, pak da su rekle: “Mrha stara, ča ne more pamet imet”.
Na Pust jutro je malo zvončari; to najveć onisti, ki nisu bili na Pusni pundejak. Na Pust ni ni pol tuliko matačena, kako na Pusni pundejak, utinut do polna. Z obed je užanca mesnu juhu od hrtene prašće kosti, kiselu repu s fažolon, olita i presnac.
Vaje za polnen oživeje selo. Judi prihojaju seh stran. Stari gredu boćat, a mladi tancat. Večer kasneje gredu i stari judi tancat. Deju, da tancaju za repu. Ki ne tanca, deju, da ne će repi imet. To deju zato, aš repa se v leta, kad pride kakova rosa, mora lišto poset. V lete, najveć tamo jakovajskega meseca, šuša stisne jutro ontrat, kad je bendima za repu set. Judi čekaju daž ale baren kakovu rosicu. Kad ča pade, si lišto na su forcu gnoj nose, kopaju, i dokle j’ umidno, hite poset repu.
Mlajeh judi ni doma. Oni su po gorah ale nejde drugde po dobitke. Zato moraju stari okol repi imet skrb. Pak zavin tega deju: “Repa nan da sako leto vrajžjega tanca”. Tako na Pust deju: “Stari tancaju za repu”. Stara užanca je, da malomanj si stari na Pust tancaju baren dva tanca, aš ki gre z divojkun tancat, mora š njun storit dva tanca. Da tanca samo jedan tanac, bi njoj bil frajar slep na jeno oko. Kad tancaju, z nogami tropaju, pribiraju i kriče: “Iju ju, hopsasa, Pust je!”
Kad su sopeli sople, ale meh, tancali su stari, utinut “hrvacki”. To j’ jako lep tanac, ale mlaji ga ne znaju. Najprvo se muški i ženska s prsti drže i na meste prebiraju z nogami. Ontrat muški žensku zavrti. Jedan čas muški podbočen visoko skače, a ženska se sama okol njega vrti. Potra sopeta skupa tancaju. Takov jedan spodoban tanac Bakrani žovu “drmeš”.
Ivo Jardas: “Kastavština”