Ki se od nas ni prtil po črešnjah i zobal jih još dokle nisu ni pravo zrele. Rane, kasne, tvoje, susedove, to ni važno ako su jušto onakove kakove moraju bit: črjene, pune soka i hrustave kad va njih zubi zarineš. Najboje su vele hrustače, škuročrjene va zreloj faze, ma moru pasat i one malo manje, ča su bele i kad dozrenu, pa one još manje, ke ni ne hrustaju pod zubeh, ma su sejeno pune diha i slatkega soka ki na leto spominje.
Lovranske su vavek bile poznate, više puti su opjevane, a danaska sako leto imamo manifestacije od lovranskeh črešanj kade jih moremo kupit i osladit se z slatken od črešanj va lovranskeh slastičarnah.
Fešta od črešanj va Lovrane dura celi šesti mesec, a subotu, 14.6. na Trge slobode bit će Fešta uz veli štrudel od črešanj. Poznato je da ta štrudel bude dug okol deset metar.
Na pet ur sope i kanta KUD Lovor.