Piše: Sonja Vlah
Va Hangare subotu 7. 6. od sedme uri večer penzići su po 28. put imeli čakavsku večer, večer kanta i domaćeh besed.
Prva misal Nele Črnjarić i Vojkice Peran je bila zakantat domaće pjesmi ke su nekada kantali naši stari va oštarije i sagdere.
Za ovu posebnu priliku su se pripravjali i imeli prove va udruge, šetemane i šetemane.
Autori nekeh pjesam su poznati (Vjekoslav Knežević), a nekeh manje, ali se su z vremenon postale narodne. Se su nan domaće, slovenske, čakavske, istrijanske, dalmatinske, zagorske.
Pa su storili scenu – oštarski stoli, tavajoli na kvadri, žmuji i boci z široken grlon.
Na zide pozornice sliki ke su naslikale članice likovne skupine, a spreda poljske rožice z margaritami.
Velimir Baćić i Željko Valenčić, kantači z gitarami, su se posložili za stol i oštarija je prodelala.
Vojkica i Nela su zibrale pjesmi, prvi blok, drugi pa treti, saki po pet, šest pjesam.
A med ten besedi Vlaste Šepić, Nadije Škerjanc, Klare Lazar i Bojane Kancijanić.
Publika je so vreme kantala, a i na kraje kada su kantači dignuli žmuji i zakantali „Kol’ko kapljic tol’ko let“.
Neki su bili po izleteh ma su pred kraj prišli pa je opet bilo 80-ak ljudi va publike.
Rukavačke črešnje ke je va košićeh prnesal penzić Branko Žigulić je podvorila Nada Dubrović, obučena kot prava oštarica. Po navade bilo je i slašćic, sakemu pomalo, a potla sega još pogovor i kanat.
Matuji nimaju katedru čakavskega sabora kako silna mesta okole. Ma, udruga penzići je zaspraven prava katedra čakavskega sabora. Oni se pogovaraju, zmišljuju, pišu, čitaju, z glavi povedaju publike i kantaju.
Va vreme festivali okole ovo je bil naš, domaći.
Tako se more reć da i tići pul Matuj kantaju – „penzići-penzići“.