Piše: J.O.Hrvatin
Svjetski dan Crvenog križa i Crvenog polumjeseca obilježava se 8. do 15. maja. Ovo je pregled neobjavljenih dokumenti.
Potlje oslobođenja u Pasjak i druga mesta okoli je rabilo pobirat dobrovoljne priloge za Rdeči križ Slovenije, za ljude ki su bili potribni. Na hartah u prilogu se vidi ki je koliko dal i valuta ka je 1946. i 1947. leta još bila lira*. Niki su dali po tri, četire i šest lir, a ki su već zmogli su dali po deset lir.
Priko Rdečega križa je prihajala i pomoć u obutvi i robi, a za to razdat su bil zadužene aktivistice po selih, a potlje pisale izvještaje (Seznam o prejemu in izdaji blaga = Popis primitka i izdane robe i Poročilo za mesec februar 1947. (izvještaj).
U temu izvještaju je napišeno da su u selu odbori AFŽ, pa Odbor osvobodilne fronte, pa prosvetno društvo (to je „Danica“) i još dvi terenske organizacije, K.L.O (Krajevni ljudski odbor = Mjesni narodni odbor) i Z.M.J.K (Zveza mladine Julijske krajine = Savez omladine Julijske krajine). Na jenu hartu je napišeno da je u A.F:Ž 88 članic.
Ni bilo puno obrasci ni birokracije kako danas, pisali su na hartu ku su jimili, potpisali i bohdigadaj.
Popisne liste za RKS Ilirske Bistrice su potpišivale Juština Jurišević i Danica Hrvatin, moja mama. Doklje uvo pišen se ćutin hvaležan da je počuvala te dokumente, važne za povijest naših kraji.
Z popisa se vidiju jimena, hišni broji i hišno ime potpisanih ki su dobili pomoć, pa se vidi i ki ljudi su u to vrime bivali u Pasjak i kadi. To je lip popis stanovništva, uglavno žensk aš se svi muški još nisu bili vrnili z Savezničkih vojsk.
Glavni odbor Rdečega križa z Ilirske Bitrice je zahteval pisat zahvalna pisma i poslat jih u Bistrc da bi se obavijestilo Međunarodni odbor Crvenega križa da se poli nas zaistinu deli pomoć bolnin i potribnin ljudon (vidi dopis).
Morda u tu temu ne pripade ma pripade tadanjemu vrimenu: slika iskaznice Slovensko-italijanske antifašističke unije za Julijsku krajinu i Trst od 1.1. 1946.leta.
Kega zanima mu moren poslat se te dokumente samo neka pošlje soju e-adresu (mail) portalu Škabelin, rada ću poslat.
Dokumenti do danas nisu objavljeni.
*Liru, (lira B ali jugoslavenska lira »B«), je izdala Gospodarska banka za Istru, Rijeku i Slovensko Primorje, a na nju je pisalo još po slovensku i talijansku. Bila je to valuta 1945–47. za Zonu B. Julijske Venecije pod vojnom upravom Jugoslavenske armije (VUJA).
